Fuad Muradov: Qarabağda həyata keçirilən layihələrin sürəti bir çox ölkələr üçün nümunə ola bilər
Qarabağda həyata keçirilən layihələrin miqyası və sürəti dünyanın bir çox ölkələri üçün nümunə ola bilər.
Crossmedia.az xəbər verir ki, bunu Diasporla İş üzrə Dövlət Komitəsinin sədri Fuad Muradov Diaspor Gənclərinin VII Yay Düşərgəsinin açılış mərasimində çıxışı zamanı deyib.
O bildirib ki, bu gün Azərbaycan xalqı işğaldan azad edilən torpaqlarda böyük quruculuq işlərini həyata keçirir:
"İstəyirik ki, siz də buraya gəlin, gördüklərinizlə və Azərbaycan xalqı ilə fəxr edin. Fəxr edin ki, belə bir dövlətiniz, belə bir Vətəniniz var. Görün ki, bu torpaqlarda əkin sahəsində çalışan da, nəqliyyat sektorunda çalışan da, texniki sahədə çalışan da öz işini ürəklə görür və bunu gələcək nəsillər naminə edir. Ona görə də bu səfərə adi bir tədbir kimi yanaşmayın. Siz seçilmiş gənclərsiniz. Bu artıq bizim yeddinci görüşümüzdür və biz hər il bu layihəni davam etdiririk".
Qeyd edək ki, Fuad Muradov Diaspor Gənclərinin VII Yay Düşərgəsinin iştirakçılarına tövsiyələr də verib. Tövsiyədə 1 həftə ərzində keçirilən tədbirləri təkcə yay düşərgəsi və ya asudə vaxt proqramı kimi yox, həm də müəyyən ideoloji məsuliyyət daşıyan bir məktəb kimi qəbul etmələri qeyd edilib.
F. Muradov vurğulayıb ki, bu istiqamətdə heç kəsi məcbur etmək mümkün deyil: "Bizim sizdən xahişimiz budur ki, Azərbaycanın yerləşdiyi coğrafiyanın həmişə mürəkkəb və həssas bir bölgə olduğunu unutmayasınız. Buna görə də ölkəmizə qarşı aparılan qara piar və dezinformasiya kampaniyaları zamanı hər biriniz öz imkanlarınız daxilində fəal mövqe nümayiş etdirəsiniz. Biz demirik ki, sabah milyonlarla insana müraciət etməlisiniz. Əgər bunu bacarsanız, əlbəttə ki, çox sevinərik. Amma ən azı yaşadığınız şəhərdə, universitetdə, məktəbdə, məhəllədə və ya dost çevrənizdə Azərbaycana qarşı əsassız iddialar səsləndirilərsə, həqiqətləri müdafiə edən ilk insanlardan biri siz olasınız". (report)
12:21 02.08.2026
Oxunuş sayı: 73
