Diaspor Gənclərinin 7-ci Yay Düşərgəsinin iştirakçıları Azərbaycana gəliblər
Azərbaycan dövləti xaricdə yaşayan azərbaycanlı gənclərlə əlaqələrin möhkəmləndirilməsinə, onların milli-mənəvi dəyərlərə bağlılığının gücləndirilməsinə xüsusi önəm verir.
Crossmedia.az xəbər verir ki, bu siyasətə uyğun olaraq Azərbaycan Respublikasının Diasporla İş üzrə Dövlət Komitəsinin və Heydər Əliyev Fondunun birgə təşkilatçılığı ilə həyata keçirilən Diaspor Gənclərinin Yay düşərgələri gənclərin Vətənlə bağlarının möhkəmləndirilməsinə, Azərbaycan həqiqətlərini yaxından tanımalarına və dünyadakı azərbaycanlı gənclər arasında əlaqələrin genişlənməsinə mühüm töhfədir.
Növbəti dəfə 2-8 avqust tarixində keçiriləcək 7-ci düşərgə "Şəhərsalma və Memarlıq İli"nə həsr olunub.
Düşərgədə iştirak etmək üçün dünyanın 64 ölkəsindən 123 azərbaycanlı gənc və Azərbaycana dost münasibət bəsləyən xalqların nümayəndələri artıq ölkəmizdədirlər.
İştirakçılar əvvəlcə Fəxri xiyabanda Azərbaycan xalqının Ümummilli Lideri Heydər Əliyevin məzarını ziyarət edib, Ulu Öndərin əziz xatirəsini dərin ehtiramla anıb, məzarı önünə əklil qoyublar.
Daha sonra onlar 1-ci və 2-ci Şəhidlər xiyabanına gələrək Azərbaycanın müstəqilliyi və ərazi bütövlüyü uğrunda canlarından keçən igid Vətən övladlarının xatirəsini ehtiramla yad ediblər.
Gənclərə Ümummilli Lider Heydər Əliyevin Azərbaycan dövlətinin möhkəmləndirilməsi, milli birliyin qorunması və diaspor siyasətinin formalaşdırılması istiqamətində həyata keçirdiyi xidmətlər barədə ətraflı məlumat verilib. Həmçinin ölkəmizin müstəqilliyi və ərazi bütövlüyü uğrunda canlarını fəda etmiş şəhidlərin qəhrəmanlığından, 44 günlük Vətən müharibəsində qazanılmış tarixi Zəfərdən və bu qələbənin ölkəmizin yeni inkişaf mərhələsinin əsasını təşkil etməsindən bəhs olunub
Paytaxtdakı ziyarət proqramını başa vuran düşərgə iştirakçıları öz təəssüratlarını bölüşüblər. Fransanın Bordo Monteyn Universitetinin tələbəsi Banu Cavadova Vətənə gəldiyinə görə böyük sevinc hissi keçirdiyini bildirib, düşərgənin müxtəlif ölkələrdən olan azərbaycanlı gənclərlə yeni dostluq əlaqələri qurmaq üçün əhəmiyyətli imkan yaradacağına əminliyini ifadə edib.
ABŞ-nin Boston Universitetinin tələbəsi Murad Bayramzadə Qarabağı görmək arzusunun gerçəkləşdiyini qeyd edib, Diaspor Gənclərinin 7-ci Yay Düşərgəsinin həyatında unudulmaz iz buraxacaq təcrübələrdən biri olacağını söyləyib.
Vyetnamda ingilis dili müəllimi kimi fəaliyyət göstərən Selen Sultan Şəhidlər xiyabanını ilk dəfə ziyarət etdiyini, burada olmağın onda həm qürur, həm də dərin duyğular oyatdığını deyib.
Rusiyanın Yekaterinburq şəhərindən gələn tələbə Mütəllim Umudov Vətənə gəlməyin sevincini bölüşüb, Qarabağa ilk səfərini səbirsizliklə gözlədiyini dilə gətirib.
Şərqi Zəngəzur iqtisadi rayonunda "Dirçələn şəhərlər" şüarı altında təşkil olunacaq düşərgə çərçivəsində panel müzakirələri, şəhid ailələri, diplomatlar və incəsənət xadimləri ilə görüşlər, müxtəlif mövzularda təlimlər, intellektual və əyləncəli proqramlar, musiqili gecələr, eləcə də ekskursiyalar keçiriləcək.
Qeyd edək ki, indiyədək Şəki, Şamaxı, Şuşa, Naxçıvan, Laçın və Xankəndi şəhərlərində Diaspor Gənclərinin Yay düşərgələri təşkil olunub. Bu düşərgələrə dünyanın 84 ölkəsindən ümumilikdə 700-dən artıq gənc qatılıb.
18:15 31.07.2026
Oxunuş sayı: 33
