Ukrayna təzyiq göstərir, Rusiya geri çəkilmir: Ekspert cəbhədəki son vəziyyəti şərh etdi
Rusiya Prezidenti Vladimir Putinin qısa müddət ərzində ardıcıl olaraq ordunun şəxsi heyətinin sayını artırması Ukrayna müharibəsinin uzunmüddətli xarakter alacağı ilə bağlı müzakirələri yenidən gündəmə gətirib. Ekspertlər hesab edirlər ki, bu addım həm cəbhədəki itkilərin kompensasiyası, həm də Rusiyanın gələcək hərbi planları ilə əlaqəli ola bilər.
Hərbi ekspert Şair Ramaldanov Crossmedia.az-a açıqlamasında bildirib ki, müharibə şəraitində şəxsi heyətin artırılması qarşıya qoyulan hərbi tapşırıqlardan və əməliyyat planlarından asılı olaraq qiymətləndirilir:
"Əgər hər hansı istiqamətdə hücum əməliyyatı və ya əraziyə nəzarətin ələ keçirilməsi planlaşdırılırsa, mövcud qüvvələr kifayət etmədikdə əlavə şəxsi heyətin cəlb olunması zərurəti yaranır. Hərb elminə görə, uğurlu hücum əməliyyatı üçün hücum edən tərəf müdafiə olunan tərəfdən ən azı üç dəfə üstün olmalıdır. Bu nisbət təmin edilmədikdə hücum əməliyyatının uğurla icrası çətinləşir".
Ekspert qeyd edib ki, cəbhə xəttinin genişlənməsi də əlavə qüvvələrə ehtiyac yaradan əsas amillərdən biridir:
"Döyüşlərin gedişində təmas xəttinin uzunluğu arta bilər. Məsələn, şərti olaraq 100 kilometrlik cəbhə xətti 110 və ya 120 kilometrə qədər genişlənərsə, həmin istiqamətdə əlavə qüvvələrin yerləşdirilməsinə ehtiyac yaranır".
Ş.Ramaldanov vurğulayıb ki, itkilərin kompensasiya edilməsi də şəxsi heyətin artırılmasının əsas səbəblərindəndir:
"Döyüşlər zamanı verilən sanitar və digər itkilərin yerinin doldurulması üçün də əlavə şəxsi heyət cəlb olunur. Bu, ordunun döyüş qabiliyyətinin qorunması baxımından vacib amildir. Rusiyanın əsas məqsədi qarşıya qoyduğu hərbi hədəflərə nail olmaqdır. Bu baxımdan şəxsi heyətin artırılması həmin məqsədlərə nail olmaq üçün görülən tədbirlərdən biri kimi qiymətləndirilə bilər. Ukraynanın Rusiyanın dərinliklərinə endirdiyi zərbələr müharibənin xarakterinə müəyyən təsir göstərsə də, Moskva strateji planlarından geri çəkilmir. Ukraynanın Rusiyanın enerji və iqtisadi infrastrukturuna, eləcə də digər strateji obyektlərinə dron zərbələri müəyyən nəticələr verir. Buna baxmayaraq, Rusiya qarşıya qoyduğu hədəflərdən imtina etmir və həmin məqsədlərə çatmaq üçün əlavə tədbirlər görməyə davam edir. Şəxsi heyətin artırılması da bu tədbirlərin tərkib hissəsi kimi qiymətləndirilə bilər".
Nigar Xəlilli
20:30 29.07.2026
Oxunuş sayı: 41
