90-cı illərdən bu günə: Sağlamlıqla bağlı tövsiyələr hələ də aktualdır
90-cı illərin dəbi yenidən geri qayıdır. Platforma ayaqqabılar, nazik parçadan hazırlanan geyimlər və yüksək belli cins şalvarlar yenidən məşhurluq qazanır. Lakin həmin dövrdən bu günə qədər gəlib çatan təkcə moda deyil. Bir sıra sağlamlıq vərdişləri də illər keçməsinə baxmayaraq öz aktuallığını qoruyub.
Crossmedia.az-ın məlumatına görə mütəxəssislərin fikrincə siqaretdən və qanunsuz narkotik vasitələrdən uzaq durmaq istənilən dövr üçün ən vacib sağlamlıq addımlarından biridir. 1990-cı illərdə siqareti tərgitməyə kömək edən nikotin plastırları və digər vasitələr geniş yayılmağa başlamışdı. Bu gün isə sübut olunur ki, siqaretdən imtina etmək yaşdan asılı olmayaraq insanın sağlamlığını yaxşılaşdırır və ömrünü uzada bilər.
Daha çox meyvə və tərəvəz yemək tövsiyəsi də dəyişməyən sağlamlıq qaydalarından biri olaraq qalır. 90-cı illərin əvvəllərində populyarlaşan "gündə 5 porsiya meyvə və tərəvəz" yanaşmasının ürək-damar xəstəlikləri, bəzi xərçəng növləri və vaxtından əvvəl ölüm riskinin azalmasına kömək etdiyi qeyd olunur.
Evdə məşq etmək vərdişi də zamanla formasını dəyişsə də, aktuallığını itirməyib. Əvvəllər insanlar Ceyn Fondanın məşq kasetlərindən istifadə edirdisə, indi bu üsulu internet platformaları və fitness tətbiqləri əvəz edib. Mütəxəssislər həftə ərzində müntəzəm fiziki aktivliyin və güc məşqlərinin sağlamlıq üçün vacib olduğunu vurğulayırlar.
Rollerli konkisürmə də 90-cı illərdən qalan faydalı fəaliyyətlərdən biri hesab olunur. Bu məşğuliyyət həm əyləncə verir, həm də yaxşı kardio məşqi ola bilər. Yeni başlayanlara isə qoruyucu dəbilqə və vasitələrdən istifadə etmək, düz səthdə sürmək və məşqlərə qısa müddətdən başlamaq tövsiyə edilir.
Açıq havada gəzinti, soya məhsullarından istifadə, peyvəndlərin vaxtında vurulması və velosiped sürərkən dəbilqə taxmaq da mütəxəssislərin bu gün üçün də faydalı hesab etdiyi vərdişlər sırasındadır.
Bununla yanaşı, həkimlər canlı ünsiyyətin əhəmiyyətinə də diqqət çəkirlər. Onların fikrincə, smartfonlar və sosial şəbəkələr insanların real münasibətlərini zəiflədə bilər. Dostlarla, ailə üzvləri ilə və yaxınlarla birbaşa ünsiyyət isə həm psixoloji, həm də ümumi sağlamlıq baxımından mühüm rol oynayır.
Mütəxəssislər qeyd edirlər ki, 90-cı illərdən qalan bəzi sağlamlıq yanaşmaları bu gün də öz dəyərini saxlayır, lakin həmin dövrün bütün vərdişlərini olduğu kimi təkrarlamaq düzgün deyil. Sağlamlıqla bağlı qərarlar müasir elmi məlumatlara əsaslanmalıdır.
Məhəbbət Tərlanoğlu
20:50 28.07.2026
Oxunuş sayı: 43
