“Şəfalı su” təhlükəsi: Mənbə suları böyrəklərə zərər vura bilər
Xalq arasında “şəfalı su” kimi tanınan təbii bulaq sularının nəzarətsiz istifadəsi sağlamlıq üçün ciddi risk yarada bilər.
Crossmedia.az xəbər verir ki, "CNN Türk" bu barədə məlumat yayıb.
Türkiyə Böyrək Fondunun (TBV) açıqlamasına görə, təmizliyi və mineral tərkibi laboratoriyada yoxlanılmamış bulaq sularının istehlakı böyrəklərə fayda vermək əvəzinə yeni xəstəliklərə səbəb ola bilər.
Fondun sədri Timur Erk bildirib ki, təhlükəsizliyi təsdiqlənməyən hər hansı bulaq suyunu sağlam hesab etmək yanlışdır. Onun sözlərinə görə, bəzi bulaq sularında müxtəlif bakteriyalar ola bilər və insanlar şəfa axtararkən fərqinə varmadan başqa sağlamlıq problemləri ilə üzləşə bilərlər.
Nefroloq Nadir Alpay isə diqqəti başqa təhlükəyə – ağır metallara yönəldib. O bildirib ki, bəzi bölgələrdə mədən fəaliyyəti nəticəsində arsen kimi ağır metallar torpağa, oradan isə yeraltı su mənbələrinə qarışa bilər. Buna görə də yalnız mikrobioloji yoxlama deyil, ağır metal analizləri də mütləq aparılmalıdır.
TBV-nin dietoloqu Gökçen Efe Aydın qeyd edib ki, insanlar böyrək daşlarını salmaq və ya böyrəkləri qorumaq ümidi ilə kilometrlərlə yol gedərək bu suları içirlər. Lakin hər bulaq suyunun mineral tərkibi fərqlidir və bəzi sularda natrium, kalsium, maqnezium, bikarbonat və kalium kimi minerallar yüksək miqdarda ola bilər. Bu səbəbdən “şəfalı” hesab edilən hər bulaq suyu hər kəs üçün eyni dərəcədə faydalı deyil.
15:16 23.07.2026
Oxunuş sayı: 35
