Azərbaycan və Türkiyə hərbi əməkdaşlığı genişləndirir
Azərbaycan ilə Türkiyə arasında hərbi əməkdaşlıq strateji müttəfiqlik münasibətlərinin əsas istiqamətlərindən biri olaraq inkişafını davam etdirir. Xüsusilə hərbi aviasiya sahəsində əməkdaşlığın genişləndirilməsi, birgə təlimlərin keçirilməsi, müasir texnologiyaların tətbiqi və peşəkar kadr hazırlığı iki ölkə arasında müdafiə əlaqələrinin mühüm tərkib hissəsinə çevrilib. Son görüşlərdə də Azərbaycan və Türkiyə arasında hərbi aviasiya sahəsində əməkdaşlığın mövcud vəziyyəti, eləcə də gələcək inkişaf perspektivləri müzakirə olunub. Ekspertlərin fikrincə, bu istiqamətdə əməkdaşlığın dərinləşdirilməsi Azərbaycanın Hərbi Hava Qüvvələrinin imkanlarının daha da gücləndirilməsinə mühüm töhfə verə bilər. Nəzərə alsaq ki, Azərbaycan və Türkiyə müxtəlif regionlarda hərbi təlimlər keçirir, əməkdaşlıqlar qurur, aviasiya sahəsində həyata keçiriləcək əməkdaşlıq da xüsusi əhəmiyyət kəsb edir.
Mövzu ilə bağlı Crossmedia.az-a açıqlama verən hərbi ekspert Emin Həsənli qeyd edib ki, Azərbaycan bütün qoşun növləri üzrə qardaş Türkiyə ilə sıx əməkdaşlıq edir: "Əməkdaşlıqda hər iki dövlət dünyada baş verən prosesləri yaxından izləsiməyi nəzərə alır. Hazırda dünyada həm hava, həm dəniz, həm də quru qoşunlarına aid yeni silahlar ixtira edilir. Ona görə Azərbaycan və Türkiyə bu prosesi yaxından izləyir. Yeni müasir silahların əldə edilməsi, kadrların təcrübə mübadiləsi, yeniliklərin tətbiqi və birgə təlimlərin keçirilməsi istiqamətində bu əməkdaşlıq uğurla davam edir".
Ekspert hərbi sahədəki texnoloji sürətə ayaq uydurmağın vacibliyini və regional tərəfdaşlığın coğrafiyasını da diqqətə çatdırıb: "Bütün sahələrdə müasir texnologiya sürətlə inkişaf edir. Hər gün, hər ay yeniliklər və dəyişikliklər var. Bu dövlətlər də çalışır ki, öz ordularında, ən vacib sahə olan hərbi sferada bu yeniliklər tətbiq olunsun. Hesab edirəm ki, bu əməkdaşlıq hər iki dövlət üçün çox önəmlidir. Biz, eyni zamanda, qardaş Pakistanla və digər bir sıra ölkələrlə də hərbi sahədə ikitərəfli əməkdaşlıq edirik. Bu da ölkəmizin milli və dövlət maraqlarına tamamilə müvafiqdir".
Fatimə Cabbarlı
18:30 06.07.2026
Oxunuş sayı: 47
