Azərbaycanın Fələstin sakinləri ilə həmrəyliyi: 2 milyon dollar humanitar yardım və dəstək təşəbbüsləri - AÇIQLAMA
Azərbaycanın Baş naziri Əli Əsədov D-8 İqtisadi Əməkdaşlıq Təşkilatının 11-ci Zirvə görüşü çərçivəsində Qəzza və Fələstin ərazilərindəki böhranın humanitar fəsadlarına diqqət çəkib. Baş nazir çıxışında Azərbaycanın Fələstin xalqı ilə həmrəyliyini ifadə edib, bu istiqamətdə atılan addımlar və beynəlxalq ictimaiyyəti məsələnin həllinə yönəltmək üçün göstərilən səylər barədə danışıb.
Mövzu ilə bağlı Crossmedia.az-a açıqlama verən Milli Məclisin deputatı Pərvanə Vəliyeva Azərbaycanın həmişə münaqişə vəziyyətindən əziyyət çəkən xalqlara dəstək olduğunu qeyd edib:
"Azərbaycan, Rusiya-Ukrayna münaqişəsi zamanı Ukraynaya dəfələrlə humanitar yardım göndərmişdi. Bu, ölkəmizin humanist yanaşmasının göstəricisidir. Eyni zamanda, Fələstin xalqına da münaqişədən əziyyət çəkdikləri üçün humanitar yardımlar təqdim edilib. Azərbaycan müsəlman ölkəsi olaraq Fələstin xalqının humanitar vəziyyətinin yaxşılaşdırılmasında dəstək göstərərək, beynəlxalq arenada ədalətli yanaşmaya sadiqliyini nümayiş etdirir".
Deputat əlavə edib ki, Azərbaycanın İsraillə də iqtisadi və hərbi sahələrdə dostluq münasibətləri mövcuddur. Buna baxmayaraq, Fələstinə göndərilən humanitar yardımlar ölkəmizin qlobal səylərə qoşulmaq istədiyini və müharibədən əziyyət çəkən insanların vəziyyətini yüngülləşdirməyə çalışdığını göstərir:
"Bu, həmrəylik nümunəsidir. Azərbaycan digər müsəlman ölkələrini və beynəlxalq ictimaiyyəti Fələstin məsələsində daha aktiv rol oynamağa çağırır".
Pərvanə Vəliyevanın sözlərinə görə, Azərbaycan Fələstin münaqişəsinin həlli üçün yeni diplomatik təşəbbüslər irəli sürə bilər:
"Azərbaycan D-8 çərçivəsində Fələstin münaqişəsinin həlli istiqamətində daha konkret və icra edilə bilən qətnamələrin qəbulunu təşviq edə bilər. Hazırda Azərbaycan, ölkədə həyata keçirilən uğurlu siyasət nəticəsində, müsəlman dünyasının lider dövlətlərindən birinə çevrilmişdir".
Deputat həmçinin vurğulayıb ki, Azərbaycan müsəlman ölkələrinə qarşı tətbiq edilən ikili standartlara qarşı açıq mövqe sərgiləyən nadir ölkələrdən biridir:
"Bir müddət əvvəl Prezident İlham Əliyev Ərəb Liqasının zirvə toplantısında müsəlmanlara qarşı ayrı-seçkiliyi və ikili standartları sərt şəkildə tənqid etmişdi. Həmin çıxış ərəb liderləri tərəfindən yüksək rəğbətlə qarşılanmışdı".
Azərbaycanın bu yanaşması müsəlman dünyasını narahat edən məsələlərə həssas yanaşmasının göstəricisidir. Prezident İlham Əliyevin Suriyadakı son hadisələrlə bağlı Türkiyə Prezidenti ilə danışaraq, Suriya xalqına humanitar yardım göstərməyə hazır olduğunu bildirməsi bu yanaşmanın bariz nümunələrindəndir.
Nihat Tahirov
13:45 20.12.2024
Oxunuş sayı: 8872
