Azərbaycanlılara qarşı vəhşiliklər: Ermənistan məlumatları paylaşmır
Ermənistanın itkin düşmüş şəxslərlə bağlı məlumatları paylaşmaqdan imtina etməsi ciddi narahatlıq doğurur. Ombudsman Aparatı bu mövzuda açıqlama verərək, itkin düşmüş şəxslərin taleyinə dair məlumatların mübadiləsinin beynəlxalq humanitar hüququn əsas prinsiplərindən biri olduğunu vurğulayıb.
Mövzu ilə bağlı politoloq Əlimusa İbrahimov Crossmedia.az-a açıqlama verib.
Onun sözlərinə görə: “Birinci dəfə deyil ki, Azərbaycan tərəfi Ermənistanın itkin düşmüş şəxslər haqqında məlumatları Azərbaycana verməməsi barədə məsələ qaldırsın. Mütəmadi olaraq Azərbaycanın müxtəlif təşkilatları itkin düşmüş şəxslər haqqında Ermənistandan onlarda olan məlumatları ala bilməməsi haqqında həyəcan təbili çalır. İrəvanın israrla bu məlumatları verməkdən imtina etməsi, düşünürəm ki, onların Azərbaycana qarşı etdikləri vəhşiliklərdən birinin üstünün açılması qorxusudur. Çünki bizdə itkin düşmüş şəxslər barədə müəyyən təhqiqatlar və kəşfiyyat məlumatları mövcuddur və bu məlumatlarda əsir düşən azərbaycanlılara qarşı divan tutulması, onların ən ağır işlərdə işlədilməsi haqda faktlar yer alır”.
Politoloq qeyd edib ki: “Azərbaycan itkin düşmüş şəxslər barəsində məlumat istəməklə onların başına gətirilən əzablar haqqında məlumatları da təsdiqləmək və hətta sübut etmək istəyir. Amma Ermənistan bu məlumatları təqdim etdikdən sonra onun beynəlxalq səviyyədə necə acınacaqlı vəziyyətə düşəcəyindən xəbərdardır. Çünki azərbaycanlı əsirlərə qarşı etdikləri hərəkətlər, onlara verdikləri əzab-əziyyət faşistlərin öz əsirlərinə verdiyi işgəncələrdən daha dəhşətlidir. Onların bu məlumatları indi verməkdən boyun qaçırmaları heç də axıra qədər davam gətirəcəkləri anlamına gəlməməlidir. Azərbaycan İrəvandan bu məlumatları zor gücünə almaq imkanına malikdir və zamanı gəldikcə bu yola da əl atacaq. Hələlik isə haylarla xoşluqla davranmaq daha məqsədəuyğundur”.
Fidan Hacızadə
13:39 20.12.2024
Oxunuş sayı: 9501
