Gündəm
İranpərəst hesablar Albert Aqarunovun irsini hədəfə alıb
Son günlər Azərbaycanın uğurlu xarici siyasəti və ölkədəki daxili həmrəylik regional gücləri narahat edir. Ölkəmizdəki multikultural mühit və müxtəlif xalqların dinc yanaşı yaşaması İranın bölgədəki maraqlarına cavab vermir. Bu səbəbdən iranpərəst şəbəkələr Azərbaycanın milli dəyərlərinə və rəmzlərinə qarşı qərəzli kampaniyalara başlayıblar.
Mövzu ilə bağlı İsrailin nüfuzlu "The Jerusalem Post" qəzetində diqqətçəkən analitik məqalə dərc olunub. Həmin məqalənin tərcüməsini təqdim edirik:
Son həftələrdə sosial şəbəkələrin Azərbaycan seqmentində yeni bir kampaniya başladılıb. Bu kampaniya Birinci Qarabağ müharibəsinin iştirakçısı, Azərbaycanın Milli Qəhrəmanı Albert Aqarunovun irsini və xatirəsini şübhə altına almağı hədəfləyir. Araşdırmalar göstərir ki, bu fəaliyyətlər növbəti dezinformasiya dalğasının bir hissəsidir. İran və iranpərəst qüvvələr iddia edirlər ki, Azərbaycan ərazisindən İrana qarşı İsrail əməliyyatları üçün baza kimi istifadə olunur.
Bəzi sosial şəbəkə hesablarında Albert Aqarunovun qəhrəmanlıq tarixçəsini hədəf alan paylaşımlar yayılıb. Bu materiallarda "Albert Aqarunov yalanı iflasa uğradı" kimi iddialar irəli sürülür və onun hekayəsinin "saxtalaşdırıldığı" deyilir. Həmin paylaşımlarda rəsmi Bakının dünyəvi siyasətinə qarşı çıxan radikal-dini qrupların ritorikasından istifadə olunub. Öz lərini "müxalifət" kimi təqdim edən bu qruplar birbaşa İrana bağlıdırlar. Ekspertlərin fikrincə, bu kampaniyanın vaxtı və üslubu rəsmi Bakının İsrail ilə strateji tərəfdaşlığını hədəf alan pro-İran narrativləri ilə tamamilə üst-üstə düşür.
Qeyd olunan iddialar yerli sosial şəbəkə istifadəçiləri tərəfindən ciddi etirazla qarşılanıb. azərbaycanlı istifadəçilər bu manipulyasiyalara qarşı sərt təpki göstəriblər. Onlar Albert Aqarunovun ölkənin bütövlüyü uğrunda canından keçən toxunulmaz bir rəmz olduğunu vurğulayıblar. Azərbaycan-yəhudi icmasının nümayəndələri və yerli analitiklər də eyni fikirdədir. Onlar bildirirlər ki, bu fəaliyyətlər qəhrəmanın obrazını ləkələmək məqsədi daşıyan sistemli bir təxribatdır.
Sosial şəbəkələrdəki bu aktivlik ABŞ-nin CNN telekanalının 5 iyun tarixli hesabatından sonraya təsadüf edir. Həmin hesabatda anonim mənbələrə istinadən bəzi iddialar irəli sürülmüşdü. İddia olunurdu ki, İsrail Müdafiə Ordusu (IDF) və MOSSAD qüvvələri Azərbaycanın cənub rayonlarında yerləşib. Onların orada kəşfiyyat, dron fəaliyyəti və mümkün xilasetmə əməliyyatları apardığı deyilirdi.
Rəsmi Bakı bu iddiaları qətiyyətlə təkzib edib. Azərbaycan tərəfi bəyan edib ki, bu cür fikirlər tamamilə əsassızdır. Azərbaycan öz suveren ərazilərindən hər hansı üçüncü dövlətə qarşı hərbi və ya kəşfiyyat məqsədilə istifadə olunmasına heç bir halda icazə vermir.
Xatırladaq ki, bakılı dağ yəhudisi olan Albert Aqarunov Birinci Qarabağ müharibəsi zamanı cəbhəyə könüllü yollanıb. O, tank komandiri kimi Şuşa uğrunda gedən döyüşlərdə qəhrəmancasına həlak olub. Ölümündən sonra ona "Azərbaycanın Milli Qəhrəmanı" adı verilib və o, Bakıda Şəhidlər Xiyabanında dəfn olunub. Hazırda ölkədə onun adını daşıyan məktəb və xatirə kompleksi var. Azərbaycan cəmiyyəti onu təkcə döyüş rəşadətinə görə sevmir. O, həm də ölkədəki multikulturalizm və multietnik birliyin mühüm simvollarından biri hesab olunur.
Tərcümə etdi: Fatimə Cabbarlı
15:54 19.06.2026
Oxunuş sayı: 475
