Tanınmış rəssam vəfat etdi
Məşhur britaniyalı rəssam Devid Hokni Londondakı evində 88 yaşında dünyasını dəyişib. O, 89 yaşını qeyd etməsinə cəmi bir ay qalmış vəfat edib.
Crossmedia.az xəbər verir ki, Devid Hokni müasir dövrün ən nüfuzlu rəssamlarından biri və 1960-cı illərin pop-art cərəyanının aparıcı nümayəndələrindən biri kimi tanınırdı. Uzun illər davam edən yaradıcılığı ərzində o, müxtəlif incəsənət vasitələri ilə işləyərək daim yeniliklərə imza atıb. Rəssam ənənəvi rəngkarlıqla yanaşı, fotoqrafiya və rəqəmsal texnologiyalardan, o cümlədən iPad vasitəsilə çəkdiyi əsərlərlə də diqqət çəkib.
Hokni xüsusilə Kaliforniyadakı hovuzları əks etdirən, günəş işığı və canlı rənglərlə zəngin əsərləri ilə məşhurlaşıb. Onun işıq və suyun harmoniyasını əks etdirən bu əsərləri dünya incəsənətinin ən tanınmış nümunələri sırasında yer alır.
2018-ci ildə rəssamın hovuz mövzusunda çəkdiyi məşhur əsərlərdən biri hərracda təxminən 70 milyon funt sterlinqə satılıb. Bu satış həmin dövrdə yaşayan rəssamın əsəri üçün ödənilən ən yüksək məbləğlərdən biri kimi tarixə düşüb.
Devid Hokni həyatının son illərinə qədər yaradıcılığını davam etdirib. O, hər gün 4-6 saat çalışdığını və rəsm çəkməyin ona həyat məqsədi verdiyini deyirdi. Rəssam yaradıcılığında həmişə bir qaydaya sadiq qaldığını vurğulayırdı: "Sevdiyin şeyləri çək".
Onun vəfatı dünya incəsənəti üçün böyük itki hesab olunur. Devid Hokninin əsərləri və sənətə gətirdiyi yeniliklər gələcək nəsillər üçün də ilham mənbəyi olaraq qalacaq.
00:49 19.06.2026
Oxunuş sayı: 43
