Sosium

Yusif Nəğməkar – Vətən qədər böyük ürəyin və poeziyanın sahibi

İyunun 15-i müasir Azərbaycan ədəbiyyatının görkəmli nümayəndələrindən, tanınmış şair, publisist və ictimai xadim Yusif Nəğməkarın doğum günüdür. Uzun illərdir şəxsən tanıdığım, yaradıcılığını böyük maraq və məhəbbətlə izlədiyim bu dəyərli insan haqqında düşüncələrimi və təəssüratlarımı oxucularla bölüşməyi özümə mənəvi borc hesab edirəm.

Yusif Nəğməkar (Mədətov Yusif Məhiş oğlu) 15 iyun 1955-ci ildə Beyləqan rayonunun Birinci Aşıqlı kəndində dünyaya göz açıb. Yaradıcılığa gənc yaşlarından başlayan şair N.Tusi adına Azərbaycan Dövlət Pedaqoji Universitetinin filologiya fakültəsini bitirib, eyni zamanda ali jurnalistika kurslarında təhsil alaraq bu sahədə də peşəkar biliklərə yiyələnib.

Onun poeziya aləminə gəlişi təsadüfi olmayıb. İlk qələm təcrübələri hələ gənclik illərində böyük sənətkarların diqqətini cəlb edib. Xalq şairi Rəsul Rzanın onun yaradıcılığına göstərdiyi maraq Yusif Nəğməkarın ədəbi mühitdə tanınmasına mühüm təkan verib. Şairin yaradıcılığı haqqında yazılmış “Təsadüf” məqaləsinin “Ədəbiyyat və İncəsənət” qəzetində dərc olunması isə onun ədəbi ictimaiyyətə təqdimatında əlamətdar hadisələrdən biri olub.

Yusif Nəğməkar uzun illər Azərbaycan Dövlət Televiziyasında çalışaraq xalqımızın taleyüklü məsələlərinə həsr olunmuş telesenarilər müəllifi kimi də fəaliyyət göstərib. Bununla yanaşı, onun şeir və poemaları ardıcıl şəkildə kitab halında nəşr olunaraq geniş oxucu auditoriyasının rəğbətini qazanıb.

Şairin yaradıcılığında Vətən sevgisi, Qarabağ ağrısı, azadlıq duyğusu, məhəbbət, təbiət gözəllikləri və milli-mənəvi dəyərlər xüsusi yer tutur. Onun poeziyası sadəcə hisslərin ifadəsi deyil, həm də fəlsəfi düşüncənin, vətəndaş mövqeyinin və mənəvi axtarışların poetik təcəssümüdür. Oxucu Yusif Nəğməkarın misralarında həm duyğu, həm də fikir dərinliyi ilə qarşılaşır.

Yaradıcılıq diapazonunun genişliyi onun musiqi ilə bağlı fəaliyyətində də özünü göstərir. Yusif Nəğməkar peşəkar saz ifaçısı kimi 1981-ci ildə Ağdamda keçirilən Xalq Yaradıcılığı Festivalının qalibi olub. Fortepiano və skripkada ifa etməyi bacarması ona bəstəkarlarla daha sıx əməkdaşlıq etməyə imkan yaradıb. Nəticədə onun sözlərinə yüzlərlə mahnı bəstələnib, bu əsərlərin əksəriyyəti xalq arasında böyük populyarlıq qazanaraq Azərbaycan Radio və Televiziyasının “Qızıl Fondu”na daxil edilib.

Şairin yaradıcılığı müxtəlif mükafatlarla qiymətləndirilib. O, “Rəsul Rza” Beynəlxalq Ədəbi Mükafatına, “İlin şairi” fəxri adına, “Azərbaycan bayrağı” və “Qızıl qələm” mükafatlarına layiq görülüb. Lakin onun qazandığı ən böyük mükafat oxucu sevgisi və xalq rəğbətidir.

Yusif Nəğməkarın şəxsiyyəti ilə yaradıcılığı bir-birini tamamlayır. Onun şeirlərindəki səmimiyyət, saflıq, ədalət duyğusu və mənəvi zənginlik həyat mövqeyindən qaynaqlanır. Təsadüfi deyil ki, böyük şair Bəxtiyar Vahabzadə onun haqqında belə deyirdi:

“Mən bu tanıdığım müddət ərzində Yusifdə şairliklə yanaşı, ilk növbədə nəciblik görmüşəm, insanpərvərlik görmüşəm, sədaqət görmüşəm, insana xas olan ən gözəl keyfiyyətləri mən Yusifdə görmüşəm.”

Bu fikirlər Yusif Nəğməkarın yalnız söz adamı deyil, həm də yüksək mənəvi keyfiyyətlərə malik bir şəxsiyyət olduğunu təsdiqləyir.

Onun yaradıcılığının zirvələrindən biri də ustad sənətkar Aşıq Ələsgərə həsr etdiyi “Ələsgər zirvəsi” əsəridir. Bu monumental əsər Azərbaycan ədəbiyyatında xüsusi hadisə kimi qiymətləndirilir. 2025-ci ilin fevral ayında keçirilən təqdimat mərasimində elm, mədəniyyət və ədəbiyyat xadimlərinin geniş iştirakı da əsərin cəmiyyət tərəfindən necə böyük maraqla qarşılandığını göstərdi.

Mən də həmin təqdimatda iştirak etmiş, müəllifin hədiyyə etdiyi kitabı bir neçə dəfə oxumaq imkanı qazanmışam. Hər dəfə bu əsərə qayıtdıqca yeni məna qatları kəşf edir, müəllifin söz sənətindəki ustalığına bir daha heyran qalıram. Dədə Ələsgər sazı və sözü ilə özünə əbədi abidə yaratmışdısa, Yusif Nəğməkar da “Ələsgər zirvəsi” ilə ustada sözdən ucaldılmış möhtəşəm bir heykəl bəxş edib.

Yusif müəllimlə şəxsi ünsiyyət isə ayrıca bir məktəbdir. Onun söhbətlərində həyat təcrübəsi, vətən sevgisi, ədəbiyyata bağlılıq və insanlara olan səmimi münasibət özünü aydın şəkildə göstərir. Azərbaycan Yazıçılar Birliyinə üzv qəbul olunmağım üçün mənə verdiyi zəmanəti və göstərdiyi mənəvi dəstəyi də həmişə minnətdarlıqla xatırlayıram.

Bu gün 71 yaşını qeyd edən Yusif Nəğməkar Azərbaycan poeziyasının yaşayan klassiklərindən biridir. Onun əsərləri yeni nəsillər üçün mənəvi məktəb, milli düşüncə və vətənpərvərlik örnəyidir.

Dəyərli şairimizi doğum günü münasibətilə ürəkdən təbrik edir, ona möhkəm can sağlığı, uzun ömür və yeni yaradıcılıq uğurları arzulayıram.