Xarici xəbərlər

Paşinyan Karapetyan və Köçəryanla gizli müzakirələr aparır

Ermənistanda baş nazir Nikol Paşinyanın müxalifət liderləri ilə gizli danışıqlar apardığına dair məlumat yayılıb.

Crossmedia.az xəbər verir ki, “Yerevan Observer”in iddiasına görə, Paşinyan son üç gündür müxalifətin əsas fiqurları – Samvel Karapetyan və Robert Köçəryan ilə aktiv müzakirələr aparır. Məlumata əsasən, danışıqların vasitəçiliyi İrəvan meri Tiqran Avinyan tərəfindən həyata keçirilir.

İddialara görə, Paşinyan müxalifət liderlərinə müəyyən hüquqi azadlıqların təmin olunmasını təklif edir və bunun qarşılığında onlardan küçə etirazlarından imtina etmələrini, həmçinin parlament mandatlarını qəbul etmələrini istəyir.

Məlumatda qeyd olunur ki, razılaşma əldə olunarsa, müxalifət daha sonra Mərkəzi Seçki Komissiyasının qərarlarını məhkəmədə mübahisələndirmək və hökuməti siyasi müstəvidə tənqid etmək hüququnu qoruyacaq.

Rəsmi İrəvandan və adı çəkilən şəxslərdən bu iddialarla bağlı hələlik açıqlama verilməyib.

Qeyd edək ki, Ermənistan siyasətində Paşinyan hökuməti ilə keçmiş prezident Robert Köçəryanın rəhbərlik etdiyi düşərgə arasında gərginlik uzun müddətdir davam edir.

🖨 Çap et

18:03 15.06.2026

Oxunuş sayı: 43