"ABŞ bu tip cavablarla ictimaiyyəti yanıltmağa alışıb" - Şərh
Yaxın günlərdə ABŞ-nin Bakıdakı səfirliyi Azərbaycan mediasının sualına cavab verməyərək, belə bir sualı "aldadıcı" kimi dəyərləndirib. Sözügedən sual isə Ermənistanda Azərbaycan xalqının mədəni irsinin qorunması ilə bağlı olub. Səfirlik də öz növbəsində, bu ölkənin işğaldan azad edilmiş ərazilərimizdə hər hansısa bir layihələr təklif etdiyini xatırlatmaqla kifayətlənib. Lakin diqqətli şəkildə nəzər yetirdikdə görə bilirik ki, bu heç də təəccüblü hal deyil. Belə ki, qayıdış hüququmuzun dəstəklənməsi xahişi ilə hələ ötən ilin aprelində ABŞ Dövlət katibi Antoni Blinkenə göndərdiyimiz məktuba bu günədək cavab verilməyib. Halbuki ötən dövr ərzində ABŞ hökuməti “insan hüquqları” adı altında bir sıra məsələləri dəfələrlə gündəmə gətirib. Bu zaman isə sual doğur:
ABŞ-nin hazırkı administrasiyası “insan hüquqları” və “mədəni irs” mövzularını yalnız Azərbaycanla bağlı məsələlər zamanı xatırlaması nəyi deməyə əsas verir?
Mövzu ilə bağlı jurnalist, siyasi şərhçi Kənan Novruzov Crossmedia.az-a açıqlamasında qeyd edib ki, ABŞ-nin belə bir cavabı, onun Ermənistan ərazilərində mövcud olan Azərbaycan abidələrinə, mədəni irsə qarşı etinasızlığının göstəricisidir:
"ABŞ və ona tabe olan strukturlar artıq bu tip cavablar, müəyyən manipulyasiya addımları ilə ictimaiyyəti yanıltmağa alışıb. Eləcə də biz burada görə bilirik ki, mədəni irsin qorunması, müxtəlif dövlətlərin tarixi abidələrinə qarşı sayğı demokratiyanın əsas əlamətlərindən olduğu təqdirdə, Vaşinqton bunların hər birindən uzaqdır.
Əks halda, Azərbaycan mediasının sualına aidiyyəti üzrə cavab verməklə yanaşı, tarixi abidələrimizə qarşı vandalizmin qarşısını çoxdan almağa çalışardı. Bu baxımdan da, ümid olunandır ki, Tramp administrasiyasında ABŞ-nin nüfuzuna xələl gətirəcək, bəzi məqamları sual altında saxlayacaq tendensiyalara son qoyulacaq. Lakin davam etdiyi müddət ərzində, şübhəsiz ki, sözügedən proseslər ABŞ-Azərbaycan ikitərəfli münasibətlərinə zərbə vurmağa davam edəcək".
Aytac Kərimova
08:04 19.12.2024
Oxunuş sayı: 8078
