Azərbaycan və Tatarıstan arasında humanitar və iqtisadi əməkdaşlıqlar dərinləşir
“Rusiya Federasiyası ilə bütövlükdə və onun federasiya subyektləri ilə də ayrılıqda Azərbaycanın yaxşı münasibətləri var. Rusiya həm iqtisadi, həm də sənaye baxımından inkişaf etmiş ölkədir”.
Bu fikirləri millət vəkili Hikmət Babaoğlu Crossmedia.az-a açıqlamasında bildirib.
Onun sözlərinə görə, “Hər regionun özünə məxsus iqtisadi göstəriciləri var. Belə olan hallarda qarşılıqlı iqtisadi inteqrasiya üçün regionlarla birbaşa əməkdaşlıq xüsusi əhəmiyyət kəsb edir. Şübhəsiz ki, federasiya subyektləri içərisində Azərbaycana milli, etnik və mədəni baxımdan ən yaxın olan federasiya bölmələrindən biri də Tatarıstandır. Ölkələr daxilində mənəvi, etnik və milli bənzərliklər mədəni və humanitar əlaqələrin dərinləşməsi, eyni zamanda ölkələrarası münasibətlərdə mühüm körpü rolunu oynayır. Bu mənada Azərbaycan və Tatarıstan xüsusi humanitar və mədəni əlaqələri ilə daim keyfiyyəti ilə seçilib”.
Millət vəkili qeyd edib ki, “Hazırda Minnixanovun Azərbaycan Prezidenti tərəfindən qəbul edilməsi və əməkdaşlığın müzakirə olunması, Azərbaycan-Rusiya münasibətləri kontekstində Tatarıstanla əlaqələrin daha da dərinləşməsinin həm bu günün çağırışı, həm də gələcəkdə münasibətlərin mühüm perspektividir. Fikrimcə, bu səfər Azərbaycan Prezidentinin görüşdə səsləndirdiyi fikirlər əlaqələrin daha da dərinləşməsinə xidmət göstərəcək".
Fidan Hacızadə
13:01 17.12.2024
Oxunuş sayı: 12164
