Dünya ciddi mənzil böhranı ilə üz-üzədir - professor
Bu gün dünyanın demək olar ki, bütün ölkələri müxtəlif formalarda özünü göstərən ciddi mənzil böhranı ilə üz-üzədir.
Bunu Ümumdünya şəhərsalma forumunun 13-cü sessiyasında Crossmedia.az-a açıqlamasında professor Taibat Olaitan deyib.
O, əlavə edib ki, bəzi ölkələrdə bu problem əlçatan və münasib qiymətli mənzillərin çatışmazlığı ilə müşahidə olunur, digər yerlərdə isə sürətli urbanizasiya, qeyri-formal məskunlaşma, sosial bərabərsizlik və iqlim dəyişikliyinin yaratdığı təsirlər mənzil məsələsini daha da ağırlaşdırır.
Bu böhran artıq təkcə yaşayış məsələsi deyil, eyni zamanda insanların sosial rifahına, təhlükəsizliyinə və gələcək həyat keyfiyyətinə birbaşa təsir edən qlobal problemə çevrilib.
Məhz buna görə də, son dörd gün ərzində keçirilən müzakirələr və sabaha qədər davam edəcək görüşlər xüsusi əhəmiyyət daşıyır.
Burada səsləndirilən fikirlər, təqdim olunan təcrübələr və müxtəlif ölkələrin yanaşmaları gələcək nəsillərin necə yaşayacağını, hansı şəhərlərdə formalaşacağını və ümumiyyətlə, davamlı yaşayış mühitinin necə qurulacağını müəyyən edən vacib istiqamətlər yaradır.
Bu tədbirin ən mühüm tərəflərindən biri də odur ki, burada yalnız hökumətlər deyil, eyni zamanda beynəlxalq təşkilatlar, özəl sektor nümayəndələri, vətəndaş cəmiyyəti institutları və akademik dairələr bir araya gəlirlər.
Çünki artıq aydındır ki, qlobal mənzil böhranının həlli yalnız bir tərəfin səyləri ilə mümkün deyil. Uzunmüddətli və dayanıqlı həll yolları üçün bütün maraqlı tərəflərin birgə əməkdaşlığı vacibdir.
Bu baxımdan, belə beynəlxalq platformalar həm təcrübə mübadiləsi aparmaq, həm də gələcək üçün ortaq strategiyalar formalaşdırmaq baxımından olduqca dəyərli və əhəmiyyətli fürsət hesab olunur.
Ayhan
15:36 21.05.2026
Oxunuş sayı: 78
