Şəxsi avtomobildən ictimai nəqliyyata keçid - 2030 hədəfi
WUF 13 çərçivəsində şəhər mobilliyi, dayanıqlı nəqliyyat və logistika həlləri əsas müzakirə mövzularından biri kimi ön plana çıxır.
Xüsusilə, sürətlə urbanizasiya edən şəhərlərdə nəqliyyat infrastrukturunun müasir çağırışlara uyğunlaşdırılması, ağıllı idarəetmə sistemlərinin tətbiqi və ekoloji baxımdan təhlükəsiz nəqliyyat modelinin qurulması artıq qlobal gündəliyin mühüm hissəsinə çevrilib.
Forum çərçivəsində bu istiqamətdə aparılan müzakirələr gələcək şəhər planlamasında nəqliyyat sektorunun rolunu bir daha diqqət mərkəzinə gətirir.
Mövzu ilə bağlı nəqliyyat eksperti Rauf Ağamirzəyev Crossmedia.az-la öz fikirlərini bölüşüb:
"Azərbaycanın son üç ildə tətbiq etdiyi rəqəmsal nəqliyyat texnologiyaları dünyanın ən mütərəqqi idarəetmə yanaşmalarından hesab olunur. Bu sistemdə qərarlar yalnız bir qovşağın tikilməsi ilə məhdudlaşmır, ümumi nəqliyyat axınları kompleks şəkildə təhlil edilir.
Toplanan məlumatlar əsasında mikro və makro səviyyəli simulyasiyalar aparılır, küçə və yol şəbəkələrində konkret ölçmələr həyata keçirilir. Nəticədə iqtisadi baxımdan ən səmərəli layihələr müəyyənləşdirilərək tətbiq olunur. Hazırda dövlət proqramı çərçivəsində həyata keçirilən yeni layihələrin əksəriyyəti də məhz bu yanaşmaya əsaslanır.
Bu gün mövcud nəqliyyat vəziyyətinin yaxşılaşdırılması istiqamətində mühüm qərarlar qəbul edilib. Əgər hazırda cəmiyyətin avtomobildən asılılığı yüksəkdirsə, dövlət proqramında bunun alternativ yollarla həlli nəzərdə tutulur.
2030-cu ilə qədər icrası planlaşdırılan tədbirlər nəticəsində insanların bir qisminin şəxsi nəqliyyatdan ictimai nəqliyyata yönləndirilməsi hədəflənir. Bununla da prioritetlər dəyişəcək, ən dəyərli resurs olan vaxtın qorunması ictimai nəqliyyat vasitəsilə daha səmərəli şəkildə təmin ediləcək".
Elmir Heydərli
15:04 21.05.2026
Oxunuş sayı: 76
