Bakıda Dünya Alpaqut Federasiyasının İdarə Heyəti iclası keçirilib
Bakıda Dünya Alpaqut Federasiyasının (WAF) İdarə Heyəti iclası keçirilib.
Crossmedia.az xəbər verir ki, federasiyanın Bakıdakı baş qərargahında təşkil olunan iclasda yeni tənzimləyici çərçivə rəsmi olaraq qəbul edilərək qüvvəyə minib.
Bildirilib ki, əvvəlcədən 17 may tarixinə planlaşdırılan toplantı hava şəraiti ilə əlaqədar yaranmış fövqəladə vəziyyət səbəbindən iki gün təxirə salınıb.
İclasa Dünya Alpaqut Federasiyasının İdarə Heyətinin sədri Vasif Namazov rəhbərlik edib. Toplantıda idarə heyətinin bütün üzvləri iştirak edib. Onlardan 8 nəfər Bakıda fiziki olaraq qatılıb, Qabil Hüseynov isə iclasa onlayn formada qoşulub.
İclas çərçivəsində federasiyanın fəaliyyətini əhatə edən “Edition 2026” adlı yeni tənzimləyici çərçivə yekdilliklə təsdiqlənib. Qeyd olunub ki, sənəd paketi 54 rəsmi sənəd və 5 ierarxiya səviyyəsindən ibarətdir.
Eyni zamanda, federasiyanın rəqəmsal doğrulama sisteminin genişləndirilməsi qərara alınıb. Belə ki, “alpagutfederation.org/verify” platformasına kimlik kartı, hakim lisenziyası, məşqçi sertifikatı və dərəcə sənədi üzrə yeni doğrulama kateqoriyaları əlavə olunub.
İclas zamanı Firas Hafez Abdalhafeez Hajalinin Fələstin Dövlətinin WAF üzrə milli nümayəndəsi kimi təyinatı ratifikasiya edilib. Bununla yanaşı, ATAMAN (Master/Tier 1) və BILGE (Senior/Tier 2) səviyyələrində beynəlxalq hakim sertifikatları da rəsmi şəkildə təsdiqlənib.
Toplantıda 2026-cı ilin dekabrında keçiriləcək Baş Assambleyaya hazırlıq məsələləri, beynəlxalq əməkdaşlığın genişləndirilməsi, anti-dopinq və idmançıların qorunması qaydaları, eləcə də 2026-2027-ci illəri əhatə edən strateji fəaliyyət istiqamətləri müzakirə olunub.
Federasiya yeni dövrün əsas prinsiplərinin sistemlilik, beynəlxalq standartlara uyğunluq, şəffaflıq və doğrulanabilirlik üzərində qurulduğunu açıqlayıb.
Qeyd edək ki, Dünya Alpaqut Federasiyası 2014-cü ildə yaradılıb və hazırda 4 qitədə 55 ölkə nümayəndəliyinə malik beynəlxalq idman təşkilatı kimi fəaliyyət göstərir.
16:21 20.05.2026
Oxunuş sayı: 381
