Zəngəzur dəhlizi region üçün yeni iqtisadi imkanlar yaradacaq
Rusiya Xarici İşlər Nazirinin müavini Mixail Qaluzin bildirib ki, Naxçıvanı Azərbaycanın əsas hissəsi ilə birləşdirəcək dəmir yolu əlaqəsinin bərpası məsələsində tərəflər arasında ümumi anlaşma əldə olunub. Dəmir yolunun Ermənistanın Zəngəzur bölgəsindən keçməklə fəaliyyət göstərəcəyi nəzərdə tutulur. Qaluzin vurğulayıb ki, bu razılaşma üçtərəfli işçi qrupunun səyləri nəticəsində mümkün olub və region üçün strateji əhəmiyyət kəsb edir.
Mövzu ilə bağlı Crossmedia.az-a açıqlama verən Milli Məclisin deputatı Vüqar Bayramov qeyd edir ki, Zəngəzur dəhlizinin açılması region üçün mühüm əhəmiyyət kəsb edən layihələrdən biridir. Onun sözlərinə görə, bu layihə yalnız Azərbaycanla Naxçıvan arasında nəqliyyat əlaqələrinin bərpası deyil, eyni zamanda regionda kommunikasiyaların inkişafına və yenidən qurulmasına şərait yaradacaq.
Deputat əlavə edib ki, Zəngəzur dəhlizinin açılması region ölkələri üçün yeni iqtisadi imkanlar yaradacaq:
"Bu dəhliz, bir tərəfdən, sahibkarların bazara çıxış imkanlarını genişləndirəcək, digər tərəfdən isə regional nəqliyyat dəhlizləri vasitəsilə daha çox yüklərin, o cümlədən Naxçıvan daxil olmaqla, Azərbaycanın üzərindən daşınmasına şərait yaradacaq".
Vüqar Bayramov həmçinin qeyd edib ki, bu dəhliz yalnız Azərbaycan üçün deyil, Ermənistan üçün də iqtisadi üstünlüklər təmin edə bilər:
"Ermənistan iqtisadiyyatının investisiyalara böyük ehtiyacı var. Yeni kommunikasiya imkanları isə Ermənistan üçün vacibdir. Ona görə də Ermənistan qərəzli siyasətdən əl çəkib, regiondakı mühüm layihələri dəstəkləməlidir. Bu layihələrdən iqtisadi mənfəət əldə etmək şansı Ermənistan üçün də mövcuddur".
Azərbaycan hökuməti artıq Zəngəzur dəhlizinin öz ərazisindən keçən hissəsi üçün infrastruktur layihələrini böyük ölçüdə tamamlayıb. Deputatın sözlərinə görə, Azərbaycan tərəfinin quru nəqliyyatının 80%-dən çoxu və dəmir yolunun 60%-dən çoxu hazırdır. Bu isə o deməkdir ki, dəhlizin açılışı ilə həm Azərbaycan, həm də Ermənistan ərazilərində uyğun infrastruktur qısa müddət ərzində fəaliyyətə başlayacaq.
Zəngəzur dəhlizinin reallaşması regionda əməkdaşlıq və iqtisadi inkişaf üçün yeni bir mərhələ açacaq.
Nihat Tahirov
09:55 16.12.2024
Oxunuş sayı: 16518
