WUF13 çərçivəsində Biznes Assambleyasının sessiyası keçirilib YENİLƏNİB
BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində Biznes Assambleyasının sessiyası keçirilib.
Crossmedia.az xəbər verir ki, qlobal media brendi “Monocle”nin baş xarici müxbiri Karlota Miqel Karreyra Rebelonun moderatorluğu ilə “Ehtimallara qarşı çalışmaq: Mənzil dəyər zəncirində özəl sektor liderliyi” mövzusunda keçirilən sessiyada adekvat mənzil təminatı ilə bağlı planlaşdırma və mənzil dəyər zəncirinin transformasiyası istiqamətində müzakirələr aparılıb. Eyni zamanda, bu kritik inkişaf çağırışı istiqamətində qlobal iqtisadiyyatda ictimai fəaliyyətlə yanaşı, özəl sektorun potensialına dair fikir mübadiləsi olub.
BMT-nin Məskunlaşma Proqramının (UN-Habitat) Regional Proqram Bölməsinin direktoru Patrik Kanaqasinqham deyib ki, Biznes Assambleyası çərçivəsində müzakirələr mütləq özəl sektoru, akademik dairələri və müxtəlifliyi əsas tərəfdaşlar kimi müəyyən edir. Burada əsas məsələ özəl sektorun və biznes tərəfdaşlarının müxtəlifliyinin aydın şəkildə müəyyən edilməsidir. Məhz biznes ictimaiyyəti bizi qarşıdakı yolda irəli aparacaq əsas sektordur. Biz bir maraq ətrafında birləşərək mövcud olan ən mürəkkəb problemlərə həllər tapmaq üçün əməkdaşlıq etməliyik.
Beynəlxalq Daşınmaz Əmlak Federasiyasının (FIABCI) prezidenti Antonio Kampaqnoli adekvat yaşayış yerlərinin yaradılmasının vacibliyini qeyd edib: “Adekvat mənzil təminatında iqlim dəyişikliklərinin nəzərə alınması çox vacibdir. Daha çox mənzil tikmək ölkələr və hökumətlər qarşısında əsas məsuliyyət olmamalıdır. Bu prosesin planlaşdırma, xidmətlərə əlçatanlıq, iqlim dəyişikliyinin təsirləri nəzərə alınmaqla həyata keçirilməsi olduqca vacibdir. 2030-cu ilə qədər 3 milyard insan hökumətlərə, şəhərlərə, bazarlara və qurumlara təzyiq göstərərək təhlükəsiz, əlverişli və iqlimədavamlı mənzillərə çıxış tələb edəcək”.
Daha sonra panel müzakirələr aparılıb.
Cənubi Afrika Yerli Hökuməti Assosiasiyasının (SALGA) baş icraçı direktoru Sithole Mbanga ölkəsində tikinti sektorundakı inkişaf və problemlərdən danışıb, transformasiya və səmərəliliyin artırılmasının, bu sahədə məlumatlara əsaslanan idarəetmənin və rəqəmsallaşdırmanın həyata keçirilməsinin əhəmiyyətini qeyd edib.
Özbəkistanın iqtisadiyyat və maliyyə nazirinin birinci müavini İlhom Norqulov ölkəsinin mənzil təminatı sahəsindəki təcrübəsindən bəhs edib, inkişaf etməkdə olan ölkələrdə mənzil islahatı proqramlarının həyata keçirilməsinin vacibliyini bildirib.
“PwC Azerbaijan” şirkətinin direktoru Günel Sadiyeva və “IND” şirkətinin landşaft arxitekturası departamentinin rəhbəri Karina Qarnaqa əlçatan mənzil təminatından, özəl sektorun bu prosesə cəlb olunması və maarifləndirilməsindən, tikinti sektorunun qarşısında duran problemlərdən, mavi və yaşıl infrastruktur layihələrinin əhəmiyyətindən danışıblar.
Kiçik və Orta Biznesin İnkişafı Agentliyinin (KOBİA) İdarə Heyəti sədrinin müavini Rüfət Atakişiyev ölkəmizdə həyata keçirilən yeni şəhərsalma layihələrindən, işğaldan azad olunmuş ərazilərdəki “yaşıl” və “ağıllı şəhər” yanaşmalarından bəhs edib.
O, kiçik və orta biznes subyektlərinin infrastruktur və tikinti layihələrində iştirakının dayanıqlı şəhər infrastrukturunun qurulmasındakı rolundan danışıb, güclü iqtisadiyyatın və davamlı şəhərlərin qurulmasında dövlət qurumları, biznes dairələri, investorlar və beynəlxalq tərəfdaşlar arasında daha güclü əməkdaşlığın vacibliyini bildirib.
BMT-nin Qlobal Saziş Şəbəkəsinin ölkə üzrə nümayəndəsi Samir Məmmədov isə adekvat mənzil təminatı və mənzil dəyər zəncirinin transformasiyası prosesinə özəl sektorun daha çox cəlb olunmasının əhəmiyyətini qeyd edib. O, korporativ dayanıqlığın biznes üçün vacibliyini vurğulayıb.
Panel müzakirələrdə Binalar və Tikinti üzrə Qlobal Alyansın (“GlobalABC”) katibliyinin rəhbəri Gulnara Roll, “Holcim Azerbaijan”ın baş direktoru Serjiu Stoykov, dünyanın ən böyük alüminium istehsalçılarından biri olan “RUSAL” şirkətinin iqlim tənzimlənməsi və beynəlxalq karifikasiya departamentinin rəhbəri Aleksey Spirin və “SmatSyban” şirkətinin baş icraçı direktoru Parisa Kloss mənzil tikintisi dəyər zənciri üçün, eləcə də innovasiyalar və əməliyyat təcrübəsinin qlobal prioritetlərə uyğunlaşdırılması istiqamətində özəl sektorun siyasət öhdəliklərindən bəhs ediblər. Çıxış edənlər, eyni zamanda, bazarda hazır mənzil həllərin həyata keçirilməsinin sürətləndirilməsinin vacibliyi qeyd edib, adekvat mənzil təminatı, təhlükəsiz, əlverişli və iqlimə davamlı mənzillərə çıxış, mənzil dəyər zəncirinin transformasiyası üçün təchizatın artırılmasının vacibliyi vurğulayıblar. Həmçinin torpaq və planlaşdırma hazırlığı, infrastruktur təminatı, tənzimləmə prosesləri və dövlət orqanları ilə bazar subyektləri arasında daha sıx koordinasiya ilə dəstəklənən inteqrasiya olunmuş aşağı karbon həlləri kimi əlverişli şərtlərin əhəmiyyəti bildirilib.
GSMA şirkətinin iqlim texnologiyaları və kommunal xidmətlər departamentinin rəhbəri Akankşa Şarma, Alman-Azərbaycan Xarici Ticarət Palatasının (AHK Azerbaijan) icraçı direktoru Narqis Vik, “Paygo & Energy” şirkətinin baş meneceri Erik Fanq, “WILO” şirkətinin regional direktoru Eva Kerstholt, “GSMA” şirkətinin iqlim və rəqəmsal texnologiyalar üzrə meneceri Leila Guici enerji təhlükəsizliyinin və enerji keçidinin, dekarbonizasiya və bərpaolunan layihələrin, iqlim dəyişikliyi və urbanizasiyanın şəhərlərin transformasiyasındakı rolundan danışıblar.
Qeyd edək ki, Biznes Assambleyası adekvat mənzil təminatı və mənzil dəyər zəncirinin transformasiyası prosesinə özəl kapitalın səfərbər edilməsi, risklərin aradan qaldırılması üçün strateji platforma təklif edir.
13.33
BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində Biznes Assambleyasının sessiyası keçirilir.
Crossmedia.az xəbər verir ki, qlobal media brendi “Monocle”nin baş xarici müxbiri Karlota Miqel Karreyra Rebelonun moderatorluğu ilə “Ehtimallara qarşı çalışmaq: Mənzil dəyər zəncirində özəl sektor liderliyi” mövzusunda keçirilən sessiyada adekvat mənzil təminatı ilə bağlı planlaşdırma və mənzil dəyər zəncirinin transformasiyası istiqamətində müzakirələr aparılır.
Eyni zamanda, bu kritik inkişaf çağırış istiqamətində qlobal iqtisadiyyatda ictimai fəaliyyətlə yanaşı, özəl sektorun potensialına dair fikir mübadiləsi aparılır.
Qeyd edək ki, Biznes Assambleyası bu prosesə özəl kapitalın səfərbər edilməsi, risklərin aradan qaldırılması üçün strateji platforma təklif edir.
18:46 17.05.2026
Oxunuş sayı: 35
