Hadisə

Azərbaycan Rabatda Beynəlxalq Qastronomiya Festivalında təmsil olunub

Azərbaycan Rabatda keçirilən Beynəlxalq Qastronomiya Festivalının (FIGS) 2-ci hissəsində iştirak edib.

Crossmedia.az xəbər verir ki, səfirlikdən verilən məlumata görə, festival Mərakeşin Diplomatik Cəmiyyəti tərəfindən Həmrəylik, Sosial İnteqrasiya və Ailə Nazirliyinin dəstəyi ilə təşkil olunub.

Mərakeş Krallığının Milli Kitabxanasında keçirilən tədbirdə 30-dan çox ölkə və beynəlxalq təşkilat iştirak edib. Festival çərçivəsində dünya xalqlarının mədəni irsi və kulinariya ənənələri nümayiş etdirilib.

Azərbaycan milli stendlə təmsil olunub. Ziyarətçilər Azərbaycan mədəniyyəti ilə daha yaxından tanış olmaq, milli mətbəxin zənginliyini kəşf etmək və ölkənin kulinariya irsinə aid yeməklərin dadına baxmaq imkanı əldə ediblər. Qonaqlara Azərbaycan mətbəxinin ənənəvi təamları - dolma, dovğa, plov və paxlava təqdim olunub.

Mərakeşin həmrəylik, sosial inteqrasiya və ailə naziri Naima Ben Yəhya Azərbaycan stendini ziyarət edib, təqdim olunan milli məhsullar və yeməklərlə tanış olub.

"Festival səmimi və dostluq ab-havasında keçib, mədəniyyətlərarası dialoqun inkişafına, xalqlar arasında qarşılıqlı anlaşmanın möhkəmləndirilməsinə və beynəlxalq həmrəyliyin təşviqinə töhfə verib", - səfirlikdən qeyd edilib.

Tədbir xeyriyyə məqsədilə təşkil olunub və toplanan vəsait ehtiyacı olanlara dəstək göstərilməsinə və xeyriyyə təşəbbüslərinin həyata keçirilməsinə yönəldiləcək.