Yeməyin içindən tük çıxır, obyekt özünə haqq qazandırır-Nonsens!
Bu günlərdə vətəndaşlardan biri Bakıda fəaliyyət göstərən Qoç Ət restoranında səhər yeməyi zamanı narahatedici bir halla qarşılaşıb. İddialara görə, təqdim olunan pendirin içindən saç tükü çıxması müştəri tərəfindən ciddi narazılıqla qarşılanıb. Hadisə yerində verilən cavab isə daha da mübahisə doğurub. Bildirilir ki, bu hal “normaldır” kimi izah edilib.
Məsələ sosial şəbəkələrdə müzakirə mövzusuna çevrilərkən, ictimaiyyət qida təhlükəsizliyi və gigiyena qaydalarına riayət olunması ilə bağlı suallar qaldırır. Vətəndaşların reaksiyası isə daha sərtdir: belə halların adi qəbul edilməsi restoran xidmət standartları ilə ziddiyyət təşkil edir. İctimai nəzarətin gücləndirilməsi çağırışları fonunda diqqətlər Azərbaycan Qida Təhlükəsizliyi Agentliyinə yönəlib. İddia olunur ki, agentlik bu kimi şikayətlərə daha operativ reaksiya verməli və müvafiq yoxlamalar aparmalıdır. Hadisə həm xidmət keyfiyyəti, həm də qida təhlükəsizliyi məsələsini yenidən gündəmə gətirib.
Mövcud sosial problemlə bağlı Crossmedia.az-a fikirlərini bildirən qida eksperti Fərid Səfərov bu durumu tənqid edib: "İctimai iaşə obyektlərində gigiyena qaydalarına əməl olunması sadəcə xidmət keyfiyyəti deyil, birbaşa insan sağlamlığı məsələsidir. “Qoç Ət” restoranında səhər yeməyi zamanı pendirin içindən saç tükü çıxması və buna “normaldır” cavabının verilməsi isə vəziyyətə nə qədər laqeyd yanaşıldığını göstərir. Belə hallara “ola bilər” kimi yanaşmaq düzgün deyil. Qida hazırlanması və təqdimatı zamanı elementar gigiyena qaydalarına əməl olunmalı, personal xüsusi geyim, əlcək və baş örtüyündən istifadə etməlidir. Çünki qidaya düşən saç, toz və digər yad maddələr məhsulun hazırlanma prosesində sanitariya qaydalarının yetərincə qorunmadığını göstərən ciddi siqnaldır".
Ekspertin fikrincə, bu vəziyyəti yalnız bir saç tükü ilə də bitmir: " Restoranlarda istifadə olunan süd məhsullarının, ətlərin və digər ərzaqların mənşəyi, saxlanma temperaturu, son istifadə tarixi və hazırlanma şəraiti daim nəzarətdə saxlanmalıdır. İstehlakçı bilməlidir ki, süfrəsinə gələn məhsul haradan alınıb, hansı şəraitdə daşınıb və necə hazırlanıb. Xüsusilə pendir, ət və süd məhsulları düzgün temperaturda saxlanmadıqda bakterial risklər artır və bu da qida zəhərlənmələrinə səbəb ola bilər. Ən narahatedici məqam isə müəssisənin məsələyə məsuliyyətsiz münasibət göstərməsidir. Bu gün pendirin içindən saç çıxırsa, sabah mətbəxdəki digər gigiyena problemlərinin də qida vasitəsilə insanlara ötürülməyəcəyinə kim zəmanət verə bilər? İnsanlar restorana sadəcə yemək yeməyə deyil, təhlükəsiz və keyfiyyətli qida qəbul etməyə gedirlər".
Sonda F.Səfərov qeyd edib ki, bu kimi hallarla bağlı Azərbaycan Qida Təhlükəsizliyi Agentliyinin nəzarəti daha da gücləndirməsi vacibdir. Yoxlamalar yalnız sənəd üzərində deyil, mətbəx şəraiti, məhsulların mənşəyi, personalın gigiyenası və saxlanma qaydaları üzərindən də ciddi şəkildə aparılmalıdır. Restoranlar yalnız reklam və görüntü ilə deyil, qida təhlükəsizliyi standartları ilə də nümunə olmalıdır.
Fatimə Məmmədova
21:08 13.05.2026
Oxunuş sayı: 89
