Mənzil böhranı sosial və iqtisadi riskləri artırır - AÇIQLAMA
Bakıda keçiriləcək Ümumdünya Şəhərsalma Forumunun 13-cü Sessiyası (WUF13) qlobal miqyasda şəhərlərin qarşılaşdığı əsas problemlərin müzakirə olunduğu mühüm beynəlxalq platformalardan biri olacaq.
Forum çərçivəsində mənzil böhranı, iqlim dəyişikliklərinin şəhərlərə təsiri, davamlı inkişaf və sosial bərabərsizlik kimi aktual məsələlər dünya ekspertlərinin iştirakı ilə geniş şəkildə müzakirə ediləcək.
BMT-nin Məskunlaşma Proqramının (UN-Habitat) təşkilatçılığı ilə keçiriləcək tədbirdə beynəlxalq təşkilat rəhbərləri, alimlər və şəhərsalma mütəxəssisləri bir araya gələcəklər.
Sessiyalarda əlçatan mənzil siyasəti, köçkünlərin mənzil təminatı, iqlim risklərinə davamlı şəhər infrastrukturu və inklüziv şəhər inkişafı istiqamətində qlobal əməkdaşlığın gücləndirilməsi əsas mövzulardan olacaq.
Məsələ ilə bağlı əmlak üzrə ekspert Ramin Osmanlı Crossmedia.az-la öz fikirlərini bölüşüb:
"Mənzil böhranı dedikdə, bir sıra ciddi sosial-iqtisadi problemlər nəzərdə tutulur. Bu məsələnin əsas mahiyyəti əhalinin gəlirləri ilə mənzil qiymətləri və kirayə haqları arasındakı uyğunsuzluqdur. Nəticədə, mənzillərin əlçatanlığı aşağı düşür və sosial gərginlik artır.
Hazırkı şəraitdə tələb mənzil təklifini üstələyir. Bu isə qiymətlərin sürətlə artmasına səbəb olur. Sosial mənzil proqramları mövcud ehtiyacın yalnız kiçik bir hissəsini qarşılayır.
Bu vəziyyət bir çox insanı öz imkanlarından kənar həll yolları axtarmağa, hətta qeyri-rəsmi tikililərə yönləndirir ki, bu da problemin daha da dərinləşməsinə gətirib çıxarır.
Dünya təcrübəsində mənzil böhranına təsir edən əsas amillər sırasında urbanizasiya prosesinin güclənməsi, tikinti xərclərinin artması, torpaq qıtlığı və şəhərsalma planlamasındakı çətinliklər xüsusi yer tutur.
İnkişaf etmiş ölkələrdə bu problemlər mövcud olsa da, Azərbaycan, xüsusilə Bakı şəhəri urbanizasiya təzyiqinə daha çox məruz qalır.
Son illərdə müşahidə olunan mühüm tendensiyalardan biri də mənzillərin yaşayış məqsədindən daha çox investisiya alətinə çevrilməsidir. Bu proses tələbi süni şəkildə artırır və qiymətlərin yüksəlməsini sürətləndirir. Kirayə bazarında da analoji tendensiya müşahidə olunur.
Mənzil böhranının qarşısının alınması məqsədilə dövlət tərəfindən müxtəlif proqramlar həyata keçirilir. İpoteka kreditləri, sosial mənzil layihələri və Mənzil İnşaatı Dövlət Agentliyinin həyata keçirdiyi layihələr bu istiqamətdə atılan addımlardandır. Bununla yanaşı, kommersiya banklarının da bu prosesə daha aktiv qoşulması problemin yumşaldılmasına töhfə verə bilər.
Nəticə etibarilə, mənzil probleminin əsas səbəbləri torpaq qıtlığı, urbanizasiya təzyiqi, tikinti xərclərinin artması və investisiya yönümlü mənzil bazarının genişlənməsidir. Bu amillərin kompleks şəkildə həll olunması mənzil böhranının qarşısının alınmasında əsas rol oynayır".
Elmir Heydərli
17:25 12.05.2026
Oxunuş sayı: 51
