İran-Azərbaycan münasibətləri: konsulluq xidməti fəaliyyətə başlayır
27 yanvar 2023-cü ildə Azərbaycan Respublikasının İran İslam Respublikasının paytaxtı Tehran şəhərində yerləşən səfirliyinə silahlı hücum edilmişdi. Hücum edən şəxs, İran vətəndaşı Yasin Hüseynzadənin səfirliyə hücumu zamanı diplomatik nümayəndəliyin mühafizə xidmətinin rəhbəri Orxan Əsgərov həlak olmuş, hücumun dəf edilməsi zamanı iki mühafizəçi yaralanmışdır. İranda Azərbaycan səfirliyinə edilən hücumdan sonra İran və Azərbaycan arasındakı münasibətlər korlanmış, Azərbaycanın İrandakı səfirliyi öz fəaliyyətini dayandırmışdı. 2024-cü il 15 dekabrdan Azərbaycan İranda konsulluq fəaliyyətini bərpa edəcək. Azərbaycanın İranda konsulluq fəaliyyətini bərpa etməsi iki ölkə arasındakı diplomatik münasibətlərin normallaşması istiqamətində hansı addımları ehtiva edir?
Mövzu ilə bağlı deputat Aydın Mirzəzadə Crossmedia.az saytına açıqlamasında bildirib:
Konsulluq xidməti diplomatik münasibətlərin tərkib hissəsidir. Ötən il İrandakı Azərbaycan səfirliyinə terror hücumundan sonra Azərbaycan İranla münasibətlərini çox aşağı səviyyəyə salmağa məcbur oldu. İran tərəfinin Azərbaycan səfirliyinə təhlükəsizlik zəmanəti verdikdən sonra bu il Tehranda səfirliyimiz açıldı, amma konsulluq xidməti hələ fəaliyyət göstərir. Hal hazırda konsulluq fəaliyyəti də fəaliyyət göstərməyə başlayır. Buna qədər İranda konsulluq fəaliyyəti Təbrizdəki baş konsulluq tərəfindən həyata keçirilirdi. Amma İran ərazicə böyük ölkədir və İranın bir küncündən digərinə Təbrizə getmə insanlar üçün problem yaradırdı. Azərbaycan tərəfi İran vətəndaşlarının çoxsaylı müraciətlərini nəzərə alaraq bu xidməti bərpa etmək qərarına. Bu çox sayda İran biznesmenlərinin Azərbaycana səfərinə, ticarət, iqtisadi əlaqələrin möhkəmlənməsinə, mədəni əlaqələrin, mədəni münasibətlərin daha yüksək səviyyəyə qaldırılmasına xidmət edəcəkdir.
Deputat açılan konsulluğun Azərbaycan İran münasibətlərinə təsirindən də danışıb:
"Hesab edirəm ki, İranla münasibətlərimiz normallaşdıqca, İran tərəfdən Azərbaycana xoş münasibət göstərildikcə, diplomatik münasibətlər tam bərpa ediləcək və iki dövlət arasındakı münasibətlər normal qonşuluq münasibətlərinə, mehriban qonşuluq münasibətləri səviyyəsinə qalxacaq".
Ayhan Ağarzayev
14:17 14.12.2024
Oxunuş sayı: 9009
