Heydər Əliyevin siyasi kursu müasir Azərbaycan dövlətçiliyinin əsasını müəyyən edib-Rəy
Müasir Azərbaycan dövlətçiliyinin formalaşması və inkişafı prosesində Heydər Əliyevin fəaliyyəti xüsusi yer tutur. Onun siyasi fəaliyyəti Azərbaycanın mürəkkəb tarixi mərhələlərində dövlətçiliyin qorunması, sabitliyin bərpası və idarəetmə sisteminin möhkəmləndirilməsi ilə yadda qalıb. Heydər Əliyevin həyata keçirdiyi siyasi kurs ölkənin inkişaf istiqamətlərinin müəyyənləşdirilməsində, dövlət institutlarının gücləndirilməsində və Azərbaycanın müasir dövlət kimi formalaşmasında mühüm rol oynayıb.
Ulu Öndərin Azərbaycan siyasi tarixindəki rolu barədə Crossmedia.az-a danışan Milli Məclisin deputatı Razi Nurullayev bildirib ki, Heydər Əliyev Azərbaycan siyasi tarixində və müasir dövlət quruculuğu prosesində mühüm və silinməz iz qoymuş şəxsiyyətdir:
"Onun fəaliyyəti ölkənin ən mürəkkəb və taleyüklü mərhələlərində sabitliyin təmin olunması, dövlət institutlarının formalaşdırılması və idarəetmə sisteminin qurulması baxımından xüsusi əhəmiyyət kəsb edir. Məhz onun rəhbərliyi dövründə Azərbaycan müstəqil dövlət kimi öz əsaslarını möhkəmləndirə, daxili siyasi çətinlikləri aradan qaldıra və beynəlxalq aləmdə öz yerini daha aydın şəkildə müəyyənləşdirə bilmişdir".
R.Nurullayev vurğulayıb ki, Heydər Əliyevin siyasi kursu həm də uzunmüddətli inkişaf strategiyasına əsaslanaraq ölkənin iqtisadi potensialının gücləndirilməsinə, enerji siyasətinin uğurla reallaşdırılmasına və Azərbaycanın regionda söz sahibi olan dövlətə çevrilməsinə ciddi təkan verib: "Onun irsi bu gün də Azərbaycan dövlətçiliyinin əsas dayaqlarından biri kimi qiymətləndirilir və ölkənin davamlı inkişafında mühüm rol oynamaqda davam edir. Heydər Əliyevin fəaliyyəti Azərbaycan dövlətinin möhkəmlənməsi, sabitliyin təmin olunması və gələcək inkişaf üçün etibarlı təməlin yaradılması baxımından tarixi əhəmiyyət daşıyır. Bu irsə hörmətlə yanaşmaq və onu inkişaf etdirərək daha güclü Azərbaycan qurmaq siyasətçilərin qarşısında duran əsas vəzifələrdəndir".
Mehriban Yariyeva
10:19 10.05.2026
Oxunuş sayı: 62
