Gündəm

Ermənistan və Türkiyə nümayəndələrinin sərhəddə görüşü - nə baş verir?

Ermənistanın Türkiyə ilə danışıqlar üzrə xüsusi nümayəndəsi, parlamentin vitse-spikeri Ruben Rubinyan sərhəddə keçirilən görüş barədə açıqlama verib. Onun sözlərinə görə, görüş müsbət və konstruktiv atmosferdə keçib. Tərəflər Axurik-Akyaka dəmir yolu sərhəd keçidinin işə salınması ilə bağlı texniki məsələləri müzakirə ediblər. Bu müzakirələr iyul ayında Rubinyan və Türkiyənin xüsusi nümayəndəsi Serdar Kılıç arasında Marqara keçid məntəqəsində əldə edilən razılaşmanın davamıdır.

Baş verənlərlə bağlı Crossmedia.az-a açıqlama verən Türkiyənin Qafqaz Strateji Araşdırmalar Mərkəzinin (KAFKASSAM) sədri, politoloq Hasan Oktay görüşə, onun məqsədinə diqqət çəkib. Onun sözlərinə görə, 44 günlük müharibədən sonra imzalanan 10 noyabr atəşkəs razılaşması hələ də daimi sülh sazişinə çevrilməyib. Türkiyə regionda problemin həlli üçün Azərbaycan, Ermənistan, Gürcüstan və İran arasında birgə müzakirələr təklif edib. Bu müzakirələrə Rusiya və Türkiyənin Moskvada təşkil etdiyi iclas ilə başlanıb. Daha sonra Türkiyə Ermənistanla xüsusi danışıqlara başlayıb. Danışıqlarda Türkiyə tərəfini səfir Serdar Kılıç, Ermənistanı isə Ruben Rubinyan təmsil edib. İlk görüş Moskva, sonrakılar isə Vyana və İğdırda keçirilib.

Vyanadakı görüşdə Türkiyə və Ermənistan sərhədinin üçüncü ölkə vətəndaşlarına açılması tövsiyə edilib, lakin bu qərar hələ qüvvəyə minməyib. Sonuncu görüş İğdırda baş tutub və Axurik-Akyaka dəmir yolunun işə salınması qərarı qəbul edilib.

Hasan Oktay qeyd edib ki, Türkiyə Ermənistanla bu danışıqları davam etdirərkən əsas məqsəd Türkiyə, Ermənistan və Azərbaycan arasında üçtərəfli sülhü təmin etməkdir. Türkiyə, Ermənistan və Azərbaycanın diplomatik əlaqələri 1991-ci ildə SSRİ-nin dağılmasından sonra yaranıb, lakin Ermənistanın Azərbaycanın Kəlbəcər rayonunu 1993-cü il 3 aprel tarixində işğal etməsindən sonra Türkiyə Ermənistanla sərhəd qapılarını bağlayıb.

Azərbaycanın 10 noyabr 2020-ci il bəyanatından sonra işğal olunmuş torpaqlarını azad etməsi sərhədin yenidən açılması üçün hüquqi əsas yaradıb. Bununla belə, Türkiyə Ermənistan və Azərbaycan arasında sülh prosesini dəstəkləmək üçün bu prosesi diqqətlə davam etdirir. Axurik-Akyaka dəmir yolunun açılması isə üçtərəfli sülhün təmin edilməsi məqsədinə xidmət edir.

Maral Şahverdili