Yaşıllaşdırma təşəbbüsü, yoxsa qanun pozuntusu? - yeni qərar nə deyir?
Azərbaycanda son dövrlərdə yaşayış mühitinin tənzimlənməsi və şəhərsalma sahəsində aparılan islahatlar çərçivəsində yeni qərarın qəbul olunması ictimaiyyətin diqqət mərkəzinə çevrilib.
Xüsusilə, fərdi yaşayış evlərinin ətrafında istifadə olunan sahələrin hüquqi statusu, onların istifadəsi qaydaları və vətəndaşların bu istiqamətdə hüquq və vəzifələri ilə bağlı məsələlər daha da aktuallaşıb.
Qəbul olunan qərar fonunda bəzi hallarda vətəndaşlar arasında həyətlərin qarşısında aparılan abadlıq və yaşıllaşdırma işlərinin qanunvericiliyə uyğunluğu ilə bağlı suallar yaranır.
Bu baxımdan, mövcud hüquqi çərçivənin aydın şəkildə izah olunması, həmçinin yaşıllaşdırma təşəbbüslərinin hüquqi baxımdan qiymətləndirilməsi xüsusi əhəmiyyət kəsb edir.
Məsələ ilə bağlı Vəkillər Kollegiyasının üzvü, hüquqşünas Rafiq Alışov Crossmedia.az-la öz fikirlərini bölüşüb:
"Qanunvericilikdə şəxsin öz həyətinin kənarında, darvazasının qarşısında gül-çiçək və ya ağac əkməsini qadağan edən hər hansı norma mövcud deyil.
Eyni zamanda, bu fəaliyyətə görə hər hansı inzibati və ya digər məsuliyyət tədbiri də nəzərdə tutulmamışdır.
Əksinə, gül-çiçək və ağac əkilməsi yaşıllaşdırma siyasətinin tərkib hissəsi olmaqla ətraf mühitin qorunmasına xidmət edir, ekoloji tarazlığın saxlanmasına və insanların sağlam həyat şəraitinin yaxşılaşdırılmasına müsbət təsir göstərir.
Yaşıllıq sahələrinin artırılması həm ətraf mühitin təmizliyi, həm də ümumi ictimai rifah baxımından mühüm əhəmiyyət daşıyır.
Bununla belə, ümumi qaydalara əsasən, vətəndaşlar yaşayış evlərinin qarşısında yerləşən ümumi istifadədə olan əraziləri özbaşına zəbt etməməli, həmin sahələrdə hərəkəti məhdudlaşdıran maneələr (məsələn, baryerlər və ya digər qurğular) quraşdırmamalıdırlar. Belə hallar qanunvericiliyin tələblərinə zidd hesab oluna bilər".
Elmir Heydərli
12:10 01.05.2026
Oxunuş sayı: 64
