Şirməmməd Hüseynov – Azərbaycan mətbuatının əvəzsiz siması

Görkəmli pedaqoq və jurnalistikamızın ağsaqqalı, Ali Media Mükafatı laureatı, Prezident təqaüdçüsü, professor Şirməmməd Hüseynov Azərbaycanın media və ictimai fikir tarixində özünəməxsus yerə sahibdir. Ömrünün 70 ildən artıq bir dövrünü mətbuatın inkişafına, gənc nəslin maariflənməsinə həsr edən və jurnalistika sahəsində unudulmaz iz qoyan Şirməmməd müəllim, təkcə pedaqoji fəaliyyəti ilə deyil, həm də alim kimi Azərbaycan tarixinin az tanınan səhifələrini işıqlandırmaqda misilsiz xidmətlər göstərmişdir.

Ustadın 100 illik yubileyi münasibətilə Crossmedia.az saytı olaraq başladığımız “Jurnalistikanın Şirməmməd Hüseynov zirvəsi” adlı rubrikamızı davam etdiririk. Azərbaycan Mətbuat Şurasının sədri, “525-ci qəzet”in baş redaktoru Rəşad Məcid rubrikamız çərçivəsində Şirməmməd müəllim haqqında təəssüratlarını bölüşüb...

“Şirməmməd Hüseynov Azərbaycan jurnalistikasının ağsaqqalı, tariximizin yorulmaz araşdırıcısı və peşəkar jurnalistikanın əbədi məktəbidir. Onun mətbuat tariximizlə bağlı tədqiqatları və yazıları milli tariximizə əvəzsiz töhfələr verib. Hər bir məqaləsi bizi yeni məlumatlarla tanış edir, mətbuat tariximizdə az məlum olan səhifələri üzə çıxarırdı”.

Şirməmməd Hüseynovun jurnalistika irsi

Professor Şirməmməd Hüseynov XX əsr Azərbaycan mətbuatının öyrənilməsinə xüsusi diqqət yetirmiş, xüsusən də Azərbaycan Xalq Cümhuriyyəti dövrünün mətbuat nümunələrini üzə çıxararaq geniş ictimaiyyətə təqdim etmişdir. Onun təşəbbüsü ilə “Həyat”, “İrşad” və “Açıq söz” qəzetlərinin ilk nömrələrinin, həmçinin AXC-nin rəsmi orqanı olan “Azərbaycan” qəzetinin “Parlamentin açılışına” və “Cümhuriyyətin bir illiyinə” həsr olunmuş nömrələri Şirməmməd Hüseynovun rəhbərliyi ilə transliterasiya olunaraq “525-ci qəzet”in əlavəsi şəklində çap edilmişdir.

Rəşad Məcid professor Şirməmməd Hüseynovun “525-ci qəzet”dəki fəaliyyətini belə xatırlayır: “Onun yazıları hər zaman məzmunlu və dəyərli olurdu. Şirməmməd müəllimin hər bir məqaləsi mətbuat tariximizlə bağlı yeni kəşflərə səbəb olurdu. O, redaksiyamız üçün yalnız müəllif deyil, həm də ilham mənbəyi idi”.

Azərbaycan mətbuatına yeni nəfəs: “525-ci qəzet”dəki fəaliyyəti

Uzun müddət “525-ci qəzet” ilə sıx əməkdaşlıq edən Şirməmməd Hüseynov bu platformada tədqiqatlarının nəticələrini və məqalələrini yayımlamışdır. Onun hər bir məqaləsi Azərbaycan mətbuat tarixini öyrənmək və yeni nəsillərə təqdim etmək baxımından əvəzsiz idi.

Sonuncu dəfə 2019-cu ilin yayında Şirməmməd müəllim yazılara fasilə verərək bildirib ki, sentyabrdan yeni məqalələrə davam edəcək. Təəssüf ki, Şirməmməd Hüseynovun vəfatı buna imkan vermədi. Rəşad Məcid onun həyat fəlsəfəsini belə ifadə edir: “Şirməmməd müəllim bir dəfə demişdi ki, ‘Hələ işim çoxdur, ona görə ölməyə vaxtım yoxdur.” Türkiyədən bir alim bu sözü eşidib deyirdi ki, “Bu adamı mütləq görməliyəm, bu cür düşüncədə olan insanla tanış olmalıyam.”

Jurnalistika məktəbi və əbədi miras

Şirməmməd Hüseynovun fəaliyyəti Azərbaycan mətbuat tarixində yeni səhifələr açmaqla yanaşı, onun tələbələri və həmkarları üçün əbədi örnək olmuşdur. Onun dərsləri və tövsiyələri təkcə jurnalistika sahəsində deyil, həm də milli düşüncənin formalaşmasında mühüm rol oynamışdır.

“Şirməmməd Hüseynov öz həyatı ilə bizə böyük bir nümunə oldu, bizə əvəzsiz bir dərs keçdi. Tələbə olarkən dörd qoşa saat bizə dərs demişdi. O, burjua ölkələrinin mətbuatı barədə danışmış, sovet senzurasının mövcud olduğu illərdə bu mövzunu xüsusi məharətlə izah edərək həqiqətləri sətiraltı şəkildə çatdırmışdı. Onun bu çıxışları mənim düşüncələrimə və gələcək həyat tərzimə dərin təsir göstərmişdi”.

Azərbaycan mətbuatı üçün gördüyü işlər, irəli sürdüyü təşəbbüslər və yazdığı əsərlər onun əvəzsiz xidmətlərindən yalnız bir hissəsidir. Rəşad Məcidin sözləri ilə desək, “Şirməmməd Hüseynov təkcə mətbuat tarixinin deyil, Azərbaycan maarifçilik ənənələrinin də canlı ensiklopediyası idi.”

Onun elmi irsi və zəngin fəaliyyət yolu gələcək nəsillər üçün əbədi bir xəzinə olaraq qalacaq...

Maral Şahverdili