Güclü Azərbaycan deyəndə Heydər Əliyevi xatırlayırıq

Ümummilli Lider Heydər Əliyev adı Azərbaycan tarixinin ən şanlı səhifələri ilə bağlıdır. Onun uzaqgörən siyasəti və müdrik idarəçilik bacarığı nəticəsində müasir Azərbaycan dövləti güclü təməllər üzərində qurulmuş, beynəlxalq arenada öz yerini möhkəmləndirmişdir. Heydər Əliyevin milli iradəni, mədəniyyəti və dövlətçiliyi birləşdirən liderliyi, xalqının taleyini daha yaxşı gələcəyə yönəltməkdə müstəsna rol oynamışdır.

Dahi şəxsiyyətin ideyaları yalnız bir dövrün deyil, bütöv bir millətin gələcəyini formalaşdıran əbədi dəyər olaraq qalır. Azərbaycan xalqı onun irsini yaşadaraq  Heydər Əliyevin müəyyən etdiyi strateji xəttə sadiqdir. 

Dahi şəxsiyyətin vəfatının ildönümündə ölkənin nüfuzlu ictimai siyasi xadimləri Heydər Əliyevlə bağlı fikirlərini Crossmedia.az saytında bölüşüblər.

“Dövlətçiliyimizin təməllərini yaratmaqla tarixi zəfərimizə gələn yolun başlanğıcı məhz Heydər Əliyev tərəfindən qoyulubdur” deyən deputat Hikmət Babaoğlu: "Bu gün Azərbaycan xalqının milli yaddaşında Heydər Əliyevin adı müstəqil Azərbaycan dövləti ilə assosiasiya olunur. Biz müstəqil, güclü Azərbaycan deyəndə Heydər Əliyevi xatırlayırıq, Heydər Əliyev deyəndə, müstəqil Azərbaycan dövlətini xatırlayırıq. Bu ictimai şüurun bütövlükdə böyük dövlət xadimi Heydər Əliyevin fəaliyyətinə verdiyi qiymətdir. Məhz bu siyasi təfəkkürdən doğan və Heydər Əliyevin dövlət quruculuğu prosesinin mahiyyətini özündə ehtiva edən, kollektiv şüurumuz Ümumilli Lider ifadəsini müəyyənləşdiribdir. Ona görə də dövlətçilik tariximizin XX əsr dövründə Heydər Əliyevin Azərbaycan xalqına xidmətləri məhz xalqımız tərəfindən də adekvat olaraq qiymətləndiriməklə onun xatirəsini və adını əbədiləşdiribdir. Xalq bu cür liderləri bilgə və müdrik adlandırır. Dini təfəkkür isə bu cür adamların fəaliyyətinə inam sistemimizin dəyərlərinə əsaslanır. Amma mahiyyət etibarilə dəyişmir. Çünki sadalanan bütün keyfiyyətlər bir liderdə cəmləşibsə, o liderin adı qurucu liderdir və xilasedici liderdir. Hesab edirəm ki, Heydər Əliyevə münasibətdə hər üç konteksdə yanaşmalar doğrudur. Çünki Heydər Əliyev sadəcə siyasi institut olaraq milli dövlətçiliyimizi qoruyub saxlamadı, həm də xalqımızın adət ənənələrini, dinini qoruyub saxlamağı bacardı".

Deputat 1990-cı illərdə Azərbaycandakı vəziyyətdən danışarkən bildirib: "Biz bilirik ki, 1990-cı illərdə hədəf sadəcə bizim tarixi torpaqlarımız deyildi. Həm də milli-mənəvi dəyərlərimiz idi. Dünyanın müxtəlif ölkələrindən müxtəlif manipulyativ dəyərlər bizə milli dəyərlər əvəzinə sırınırdı. Onların sırasında istismarçı demokratiya, aldadıcı qərb dəyərləri, cəmiyyəti dəyərsizləşdirməyə xidmət edən cərəyanlar, dini dəyərlərimizi hədəf alan fəaliyyətlər var idi. Heydər Əliyev bunların hamısına qarşı mübarizə aparmağı bacardı.

Düşünürəm ki, bütün bunlar nəticə etibarilə müasir beynəlxalq münasibətlər sistemində Azərbaycanın rolunu təyin etdi və sonrakı mərhələdə böyük tarixi qələbə qazanacaq qədər potensiala sahib olan ölkəmizin iqtisadi, hərbi, siyasi əsaslarını formalaşdırdı".

Hikmət Babaoğlu Heydər Əliyevin hərtərəfli fəaliyyətindən də danışıb: "Heydər Əliyevin böyüklüyü burdadır. Dövlətçiliyimizin təməllərini yaratmaqla tarixi zəfərimizə gələn yolun başlanğıcı məhz Heydər Əliyev tərəfindən qoyulubdur. Onun yaratdığı ideoloji həmrəylik dövlətin hər bir fərdin fəaliyyətinin cazibə mərkəzi kimi müəyyən edilməsi, hamının özünü öz milli dövlətinə mənsub hesab etməsi ən müxtəlif əlamətlərə görə hüquqi dövlət kontekstində heç kəsi heç kəsdən ayırmaması məsələləri, həm də müstəqil Azərbaycan dövlətini ədalət paylayan bir sistem kimi Azərbaycan xalqına yenidən təqdim edir. Bütün bunlar böyük dövlət xadimi Heydər Əliyevin Azərbaycan xalqı qarşısındakı xidmətin yalnız bir hissəsidir".

Heydər Əliyev irsi bir məktəbdir, bu irsin daim öyrənilməsi və gələcək nəsillərə çatdırılması bütün dövrlərin  tələbi, çağırışıdır - Deputat Vüqar Rəhimzadə: "Müasir müstəqil Azərbaycan dövlətinin memarı və qurucusu, Ümummilli Lider Heydər Əliyevin anım günüdür. Müstəqilliyimizin dönməz xarakter alması Ulu Öndərin yorulmaz fəaliyyətinin, qətiyyətinin, zəngin idarəçilik təcrübəsinin, ən əsası Azərbaycan dövlətinə, xalqına bağlılığının nəticəsidir.  Dahi şəxsiyyət Azərbaycanın ən çətin günlərində, 1993-cü ilin iyun ayında xalqın təkidli tələbi ilə hakimiyyətə qayıtdığı ilk günlərdə bu əminliyi ifadə etmişdi ki, Azərbaycanın dövlət müstəqilliyi əbədi olacaqdır, sarsılmaz olacaqdır, dönməz olacaqdır və Azərbaycanın bugünkü gənc nəsli gələcək Azərbaycanı daha da yüksəklərə qaldıracaqdır.

Ümummilli Lider düşünülmüş və gələcəyə hesablanmış siyasəti nəticəsində  müstəqilliyinin bərpasının ilk illərində böyük faciələrlə, təhlükələrlə üz-üzə qalan  Azərbaycanı xaosdan, anarxiyadan, iqtisadi böhrandan xilas edərək  inkişaf, tərəqqi yoluna çıxardı.  Torpaqlarımızın işğalının qarşısı alındı.  1994-cü ilin 12 may tarixində Ermənistanla atəşkəsin əldə edilməsi  bütün sahələrdə dayanıqlı inkişafın təmin edilməsində əhəmiyyətli rol oynadı. Həmin il sentyabrın 20-də isə çağdaş tariximizə “Əsrin müqaviləsi” kimi daxil olan neft sazişi imzalandı. Bu saziş Azərbaycanın sabitlik diyarı kimi mövqeyinin möhkəmlənməsində, iqtisadi və siyasi müstəqilliyinin təmin edilməsində əhəmiyyətli rol oynadı. Azərbaycanın qısa müddətdə sabitlik diyarı kimi nüfuz qazanması  ölkəmizlə iqtisadi əməkdaşlıqda maraqlı olan dövlətlərin sayının artmasını şərtləndirdi. Bu reallıq daim önə çəkilir ki, müstəqilliyimizin bərpasının ilk illərində ictimai-siyasi durumun gərginliyi  Azərbaycanın zəngin iqtisadi potensiala  malik olmasına baxmayaraq ölkəmizlə  əməkdaşlıq əlaqələrinin qurulmasında maraqlı olan dövlətlərin  tərəddüdlərinə səbəb olmuşdu. Onlar yatıracaqları investisiyaların təhlükəsizliyinə tam əmin deyildilər. Lakin Ulu Öndər xalqın təkidli tələbi ilə hakimiyyətə qayıdışından sonra   xilaskarlıq missiyasını  uğurla yerinə yetirərək Azərbaycanda sabitliyin təmin edilməsini prioritet məsələ kimi qarşıya qoydu. Artıq xarici investorlar yatıracaqları investisiyaların təhlükəsizliyinə tam əmin idilər. 1994-cü ildə imzalanan “Əsrin müqaviləsi” bunun təsdiqi oldu".

Deputat həmçinin qeyd edib: "Ümummilli Lider Heydər Əliyevin “İqtisadiyyatı güclü olan dövlət hər şeyə qadirdir” tezisi hər zaman öz aktuallığını qoruyur, dövlətimizin həyata keçirdiyi siyasətin əsasını təşkil edir. İqtisadi və siyasi islahatların vəhdətinin qorunması davamlı inkişafa yol açdı.  Ümummilli Lider iqtisadiyyatı dirçəltdi, əhalinin sosial müdafiəsini prioritet məsələ kimi qarşıya qoydu. Bildirdi ki, neft Azərbaycanın ən böyük  sərvəti olub, xalqa, özü də təkcə indiki nəslə deyil, həm də gələcək nəsillərə mənsubdur. Ümummilli Liderin Fərmanı ilə 1999-cu ildə yaradılan Dövlət Neft Fondunun vəsaitləri hesabına həyata keçirilən sosial-iqtisadi layihələr ümumilikdə Azərbaycanın hərtərəfli inkişafına xidmət edir. Daim neftlə zəngin ölkələrə baxış əsasında bu reallıq da diqqətə çatdırılır ki, bu resurslar heç də hər zaman onlara uğur gətirmir. Əhali arasında təbəqələşmə prosesi gedir. Azərbaycanın iqtisadi imkanları isə güclü sosial siyasətin həyata keçirilməsini şərtləndirir. Neft gəlirlərinin idarə olunmasında şəffaflığın yüksək səviyyədə qorunması mühüm sosial-iqtisadi layihələrin uğurlu icrasını təmin edir. Azərbaycanın malik olduğu iqtisadi imkanlardan  səmərəli istifadə etmək məqsədilə həyata keçirdiyi  enerji layihələri ölkələr, xalqlar arasında dostluq körpüsü yaradır. Bu layihələr dünyanın enerji xəritəsini dəyişir. Onların icrası yalnız iştirakçı deyil,  digər dünya dövlətlərinin də  uzunmüddətli iqtisadi inkişafını təmin edir. Regional çərçivədə qurulan əməkdaşlıq  hazırda coğrafiyasını genişləndirərək yeni-yeni layihələrin gündəmə gətirilməsi ilə müşayiət olunur. Cənub Qaz Dəhlizinin tam tərkibdə  istifadəyə verilməsi ölkəmizin etibarlı tərəfdaş kimi mövqeyinin möhkəmlənməsində öz sözünü deyir. Artıq hazırda bu layihənin əsas tərkib hissələri olan TANAP-ın və TAP-ın genişləndirilməsi əsas çağırışlar sırasındadır".

Vüqar Rəhimzadə  Ulu Öndərib neft strategiysından da danışıb: "Bu gün ölkəmizin bərpaolunan enerji mənbələrinə investisiyaların yatırılması istiqamətində göstərdiyi səylər, imzalanan sənədlər də Ulu Öndər Heydər Əliyevin müəllifi olduğu neft strategiyasının nəticəsidir. Hazırda bütün dünyada yaşıl enerjiyə keçid əsas hədəfdir. Bu günlərdə dünyanı Azərbaycana toplayan COP29 tədbiri də Azərbaycanın uğurlu enerji diplomatiyasının təqdimatı oldu. Azərbaycan neft-qaz ölkəsi kimi bu sahədə də özünü göstərdi. Dünyada hər kəs bir daha gördü ki, Azərbaycanın  gündəliyi yaşıl enerji ilə bağlıdır. Yaşıl enerji növlərinin yaradılması və yaşıl enerjinin dünya bazarlarına nəqli hazırda enerji siyasətimizin prioritetidir. COP29 Azərbaycanın dünyaya təqdimatında növbəti tribuna oldu".

Deputat ikinci Qarabağ müharibəsi və antiterror əməliyyatlarında da danışıb: "44 günlük Vətən müharibəsində qazanılan Zəfər, ötən ilin sentyabrında bir günlük antiterror tədbirləri nəticəsində suverenliyimizin tam bərpası Azərbaycanın 1993-cü ildən bugünədək keçdiyi inkişaf yolunun ümumiləşdirilmiş ifadəsi, Ümummilli Liderin cənab İlham Əliyevə etimadının özünü doğrultmasının nümayişidir.  Bu gün  azad Qarabağda və Şərqi Zəngəzurda aparılan möhtəşəm bərpa və quruculuq işlərinin əsasında Ulu Öndər Heydər Əliyevin uzaqgörən siyasəti, praqmatik strategiyası, milli dövlətçilik konsepsiyası dayanır. Xalqımız Ulu Öndərin xilaskarlıq və quruculuq missiyasını unutmur və bundan sonra da heç zaman unutmayacaq. Azərbaycan var olduqca Ulu Öndər Heydər Əliyevin ideyaları əbədi yaşayacaq. Azərbaycana bu gün hansı tərəfdən baxsaq Ulu Öndər Heydər Əliyevin xidmətlərinin miqyasının genişliyini, zənginliyini görərik. Onun fəaliyyətinin hər bir dövrü, hər bir sahəsi tədqiqat mövzusudur. Ümummilli Liderin  xidmətləri ilə bağlı  çoxlu sayda kitablar yazılıb və yazılmaqdadır. Ərsəyə gələn hər bir yeni  nəşr, eyni zamanda məqalə  bu xidmətlərə  müxtəlif yanaşmaları ortaya qoysa da, ümumi fikir budur ki, Azərbaycanın bugünkü gerçəklikləri, dünyaya səs salan zəfərləri Heydər Əliyev siyasətinin təntənəsidir. Heydər Əliyev irsi bir məktəbdir, bu irsin daim öyrənilməsi və gələcək nəsillərə çatdırılması bütün dövrlərin  tələbi, çağırışıdır.

Dövlətimizin başçısı İlham Əliyevin və Azərbaycanın Birinci vitse-prezidenti Mehriban xanım Əliyevanın birgə səyləri nəticəsində ölkəmiz hər bir hədəfə uğurla nail olur, yeni hədəflərə doğru irəliləyir.  Nə qədər ki müstəqil  Azərbaycan dövləti, xalqı var, Ulu Öndər Heydər Əliyev ürəklərdə yaşayacaq, Onun gerçəkləşən  ideyaları inkişaf yolumuzu işıqlandıracaq".

Heydər Əliyevi tək Azərbaycanın deyil, Qafqazın deyil, dünyanın ən böyük şəxsiyyəti adlandıran deputat Aydın Mirzəzadə: "Heydər Əliyev tarixi şəxsiyyətdir. Təkcə Azərbaycanın, Qafqazın deyil, bəşəriyyətin tarixi şəxsiyyətlərindən biridir. Baxmayaraq ki, ərazisi və əhalisi kiçik olan bir ölkənin uzun müddət rəhbəri olub, Heydər Əliyevin dövlət qurmaq bacarığı və cari məsələləri həll etmək qabiliyyəti istənilən ölkə üçün yetərli hesab edilə bilər. Heydər Əliyev çalışdığı hər sahədə cəmiyyətə uğur gətirəcək addımlar atmışdır. Təhlükəsizlik orqanlarını – cəmiyyəti cəzalandıran o orqanları – cəmiyyəti qoruyan orqanlara çevirmişdir. O, Azərbaycanı kənd təsərrüfatı-sənaye bölgəsindən sənaye-kənd təsərrüfatı bölgəsinə çevirmişdir".

Deputat, Heydər Əliyevin Azərbaycana birinci rəhbərliyi dövründə danışıb: "Heydər Əliyevin Sovet Azərbaycanına 13 illik rəhbərliyi ərzində ölkədə 250 müəssisə tikilmiş, 6 universitet açılmış, 800-ə yaxın orta məktəb inşa edilmişdir. Azərbaycan mədəniyyət və incəsənətinə böyük diqqət ayırmış, Azərbaycan mədəniyyətinin nümayəndələrini SSRİ və dünya səviyyəsində tanıtmışdır. Xalqımızın inamını özünə qaytara bilmişdir. Heydər Əliyevin fəaliyyəti SSRİ üçün bir nümunə idi. O, SSRİ rəhbərliyində tarixən təmsil olunan iki azərbaycanlıdan biri olmuşdur: uzaq keçmişdə Nəriman Nərimanov və XX əsrin sonuna yaxın Heydər Əliyev".

Heydər Əliyevin Azərbaycana istər birinci istər ikinci rəhbərliyi dövründə Azərbaycan siyasi qarışıqlıq dövründə idi. 

Deputat Aydın Mirzəzadə Heydər Əliyevin Azərbaycana ikinci rəhbərliyi, yeni prezident kimi fəaliyyətinə diqqət çəkib: "Heydər Əliyevin siyasi təcrübəsi və nüfuzu Azərbaycanın dövlət müstəqilliyini bərpa etdikdən sonra daha da əhəmiyyət kəsb etmişdir. Heydər Əliyev Azərbaycanda vətəndaş müharibəsinin qarşısını almış, nefti Azərbaycanı bədbəxt edən faktordan xoşbəxt edən faktora çevirmişdir. Hüquqi demokratik dövlətin əsasını qoymuş, insan hüquq və azadlıqlarını bərqərar etmişdir. Heydər Əliyev mətbuat üzərindəki dövlət senzurasını ləğv etmiş və ölüm hökmünü şərtsiz ləğv edən ilk ölkə rəhbəri olmuşdur".

İlham Əliyevi Heydər Əliyev siyasi kursunun davamçısı adlandıran deputat bildirib: "Heydər Əliyev Azərbaycanda ordu quruculuğuna xüsusi diqqət yetirmişdir. Onun əsasını qoyduğu ordu sonrakı prezident İlham Əliyev tərəfindən daha da möhkəmləndirilmişdir. Heydər Əliyevin siyasi kursunu davam etdirən cənab prezident İlham Əliyev Azərbaycan ərazi bütövlüyünü təmin etmiş, Azərbaycanı dünyanın nüfuzlu dövlətlərindən birinə çevirmişdir. Heydər Əliyev Azərbaycanın gələcəyə gedən strateji yolunu müəyyənləşdirmişdir. Bu gün Azərbaycan həmin yolda uğurlar qazanmaqdadır. Heydər Əliyev siyasi kursu bu gün İlham Əliyev tərəfindən uğurla davam etdirilir və xalq-hakimiyyət birliyi möhkəmdir. Heydər Əliyev hər bir azərbaycanlının qəlbində xüsusi hörmətə malikdir. Nə qədər ki, Azərbaycan var, Heydər Əliyevin adı da yaşayacaqdır".

Hazırladı:
Ayhan Ağarzayev