Azərbaycan-ABŞ münasibətləri gələcəkdə necə olacaq?
Azərbaycan Xarici İşlər Nazirliyi ABŞ Dövlət Katibi Entoni Blinkenin ölkəmizdə insan hüquqları və azadlıqları ilə bağlı irəli sürdüyü qərəzli bəyanatını kəskin şəkildə tənqid edib. Nazirliyin sözçüsü Ayxan Hacızadə bu açıqlamanın Azərbaycanın daxili işlərinə müdaxilə məqsədi daşıdığını və iki ölkə arasında münasibətlərin inkişafına mane olduğunu bildirib. O vurğulayıb ki, ABŞ Dövlət Departamentinin son dörd ildəki fəaliyyəti ikili standartlara əsaslanır.
Mövzu ilə bağlı Crossmedia.az-a açıqlama verən Milli Məclisin deputatı Ceyhun Məmmədov Azərbaycanın ABŞ-la əməkdaşlıqda maraqlı olduğunu və bu istiqamətdə daim səy göstərdiyini qeyd edib. O bildirib ki, Azərbaycan bir dövlət olaraq hər zaman iki ölkə arasında münasibətlərin gücləndirilməsi üçün fəal mövqe nümayiş etdirib:
“Dövlətimiz ABŞ ilə əməkdaşlığı inkişaf etdirmək üçün hər zaman çalışıb. NATO ilə əlaqələrimizdə, Əfqanıstan məsələsində və digər beynəlxalq mövzularda geniş əməkdaşlıq münasibətlərimiz mövcud olub. Bugünkü istəyimiz bu əlaqələrin daha da inkişaf etdirilməsi və qarşılıqlı işbirliyinin asanlaşdırılmasıdır. Lakin ABŞ-nin son bəyanatları və bəzi addımları Azərbaycan tərəfindən narazılıqla qarşılanıb. Xüsusilə Ermənistanın haqsız mövqeyinin dəstəklənməsi vəziyyəti daha da mürəkkəbləşdirir”.
Deputat əlavə edib ki, Azərbaycan ABŞ ilə əməkdaşlığın əvvəlki dövrlərdə olduğu kimi yüksək səviyyədə bərpa ediləcəyinə ümid edir: “Azərbaycan Amerika ilə əməkdaşlıqda hər zaman fəal iştirak edib. İndi əsas hədəf bu əlaqələrin daha da genişləndirilməsi və möhkəmləndirilməsidir. Bunun üçün ABŞ-nin yeni administrasiyasının həyata keçirdiyi siyasət əsas rol oynayacaq. Ümid edirik ki, gələcəkdə iki ölkə arasında dialoq və qarşılıqlı anlaşma daha da möhkəmlənəcək”.
Qeyd edək ki, Azərbaycan Xarici İşlər Nazirliyi ABŞ Dövlət Departamentinin son mövqelərinin beynəlxalq hüququn prinsiplərinə zidd olduğunu və Azərbaycanın müstəqil siyasətinə təzyiq məqsədi daşıdığını bir daha bəyan edib. Nazirlik vurğulayıb ki, bu cür mövqelər regionda sabitliyə və inkişaf proseslərinə mənfi təsir göstərə bilər.
Azərbaycan dövləti gələcəkdə ABŞ ilə əlaqələrin daha sağlam əsaslarla qurulması üçün hər iki tərəfin səmərəli dialoq və əməkdaşlıq prinsiplərinə əməl etməsinin vacibliyini diqqətə çatdırır.
Nihat Tahirov
12:34 12.12.2024
Oxunuş sayı: 10239
