Özəl baxçalarda uşaqlar nə yeyir?
Son günlər media və sosial şəbəkələrdə aylıq ödənişi çox yüksək olan özəl baxçalarda uşaqlara təqdim edilən qidaların keyfiyyətsiz, bəzən isə yararsız vəziyyətdə olması ilə bağlı yayılan videolar cəmiyyətdə ciddi narahatlıq doğurub.
Bu, ilk belə hal deyil və oxşar şikayətlərin mütəmadi şəkildə gündəmə gəlməsi artıq problemin sistemli xarakter daşıdığını göstərir.
Valideynlərin övladlarını etibar etdiyi bu müəssisələrdə baş verənlər nəzarət mexanizmlərinin yetərli olub-olmaması sualını da aktuallaşdırır. Mövcud vəziyyət özəl baxçalarda məsuliyyət, nəzarət və keyfiyyət standartlarının hansı səviyyədə təmin edildiyini yenidən müzakirə predmetinə çevirir.
Mövzu ilə bağlı təhsil eksperti Elçin Əfəndi Crossmedia.az-a açıqlama verib:
“Özəl baxçalarda qidaların keyfiyyətsiz olması və yaxud da hədsiz baha olması məsələsi, təbii ki, həmin özəl baxçaların fəaliyyəti ilə əlaqədardır. Yəni demək istədiyim odur ki, bu məsələ onların birbaşa nəzarəti altındadır. Özəl baxçalara görə məsuliyyəti Təhsil Nazirliyindən başlamış digər dövlət qurumlarına qədər aid etmək doğru deyil. Çünki özəl baxça konkret özəl bir subyektdir”.
Ekspert əlavə edib ki, məsuliyyət cəmiyyət qarşısındadır və əgər bu istiqamətdə fəaliyyət göstərirlərsə, orada qidalar təqdim olunursa, düşünürəm ki, ən azı təqdim etdikləri qidaları Qida Təhlükəsizliyi Agentliyi yoxlamalı, nəzarətdə saxlamalıdır:
“Eyni zamanda, qiymətlər həddindən artıq yüksəkdirsə, bu məsələ İqtisadiyyat Nazirliyi yanında antiinhisar qurumu tərəfindən diqqətə alınmalıdır. Əgər qidaların tərkibi keyfiyyətsiz və ya yararsızdırsa, yenə də bu, Qida Təhlükəsizliyi Agentliyi tərəfindən ciddi nəzarətə götürülməlidir.
Təbii ki, bu kimi hallara yol verən baxçılarla bağlı qanunvericiliyə uyğun şəkildə ciddi tədbirlər görülməlidir. Özəl baxçılarla bağlı bu tip xəbərlərin gündəmə gəlməsi, düşünürəm ki, artıq valideynlər üçün də xəbərdaredici bir siqnal rolunu oynamalıdır.
Ümumiyyətlə, özəl baxçaların məsuliyyətlə yanaşması vacibdir. Bildiyiniz kimi, dövlət-özəl tərəfdaşlığı çərçivəsində bəzi hallarda dövlət büdcəsindən şagirdlərin özəl baxçalarda təhsil alması üçün maliyyə də ayrılır.Bu baxımdan, onların daha da diqqətli olması zəruridir. Belə məsuliyyətsiz davranışlara – istər ərzaq qiymətlərinin süni şəkildə artırılması, istərsə də keyfiyyətsiz qidaların təqdim edilməsi hallarına yol verilməsi qəbuledilməzdir. Düşünürəm ki, bu doğru deyil və belə hallara yol verən baxçılar haqqında qanunvericiliyə uyğun ciddi tədbirlər görülməlidir”.
Ayhan
11:20 25.04.2026
Oxunuş sayı: 587
