Bakıda keçirilən Şəhərsəlma Forumu şagird və tələbələrin dünyagörüşünə müsbət təsir edəcək - Ekspert
Azərbaycan növbəti dəfə qlobal müzakirələrin mərkəzinə çevrilərək möhtəşəm Şəhərsalma Forumuna ev sahibliyi etməyə hazırlaşır. Bu mühüm tədbir zamanı paytaxtdakı nəqliyyat infrastrukturunun səmərəli idarə olunması və təhlükəsizliyin təmin edilməsi məqsədilə ali təhsil müəssisələrinin distant təhsilə keçidi qərara alınıb. İlk baxışda bu addım təhsilin davamlılığı baxımından müəyyən suallar doğursa da, mövcud rəqəmsal imkanlar və pandemiyadan qazanılan təcrübə bu keçidin itkisiz reallaşacağına dair nikbin proqnozlar verir. Xüsusilə forumun gətirdiyi qlobal biliklərin təhsil mühiti ilə inteqrasiyası gənclərin dünyagörüşünün artırılması üçün yeni fürsətlər yaradır. Məsələ ilə bağlı təhsil eksperti İlqar Orucov Crossmedia.az-a açıqlama verib.
"Ümumiyyətlə, Şəhərsalma Forumu zamanı dərslərin distant formaya keçirilməsi ilə bağlı müvafiq qərar qəbul olunub. Bu, təhlükəsizliyin təmin olunması və nəqliyyat sıxlığının qarşısını almaq üçün effektivdir".
Ekspert təhsilə davamiyyətlə bağlı yarana biləcək problemləri istisna etməyib, lakin keçiriləcək tələbə və şagirdlərin dünyagörüşünə çox müsbət təsir edəcəyini, onların yenilik yaşayacağını qeyd edib: "Əlbəttə ki, təhsilin davamlılığı baxımından müəyyən təbii risklər ola bilər. Bu addımın yarada biləcəyi əsas problemlərə nəzər salanda rəqəmsal bərabərsizlik ön planda görünür. Çünki hər bir tələbənin və ya şagirdin yüksək sürətli internetə və ya lazımi texniki avadanlıqlara eyni səviyyədə çıxışı olmaya bilər. Bu, həm də bəzi dərslərdə iştirakın aşağı düşməsi ilə nəticələnə bilər. Amma bizim ölkəmizdə və eyni zamanda dünyada COVID-19 pandemiyası zamanı dərslər daha uzun müddət ərzində distant formatda keçirilirdi. İndi isə zaman çox azdır. Mən o mənada bunun ümumilikdə təhsilin keyfiyyətinə hansısa mənfi təsir göstərəcəyini düşünmürəm. Və bu qlobal forumun əhəmiyyəti, orada müzakirə olunan mövzuların eyni zamanda məktəb dərsləri zamanı müvafiq mövzularla əlaqələndirilməsi şagirdlərin dünyagörüşünün artırılmasına, onların məhz bu sahədə bilik və bacarıqlarının yüksəldilməsinə də təkan verə bilər. Əlbəttə ki, bu, qlobal bir tədbirdir və bunun ölkəmizdə keçirilməsi çox önəmlidir. Bu, ölkəmizin adına növbəti uğurlu hadisələrdən biri kimi yazılacaq. Bu mənada dərslərin məzmununun və keyfiyyətinin aşağı düşəcəyi ilə bağlı iddiaları çox da qəbul etmirəm. Fikirləşirəm ki, dövlətimiz və xalqımız naminə kifayət qədər möhtəbər bir beynəlxalq tədbirin keçirilməsinin üstünlükləri kifayət qədər böyükdür. Əminəm ki, qısa bir müddətdə tələbələr və onların müəllimləri bütünlükdə bu prosesi tənzimləyəcək".
İ.Orucov onu da bildirib ki, distant təhsildə keçid edənlər tələbələr olduğu üçün, onların təhsillə bağlı hər hansı probleminin yaranması gözlənilən deyil: "Nəzərə almaq lazımdır ki, bu, ancaq paytaxtdakı universitetlərə aiddir. Məktəblərdə isə onsuz da tədrisin başlama vaxtə dəyişib. Odur ki, şagirdlər üçün hansısa problem olmayacaq. Distant təhsilə keçənlər tələbələrdir və onların hər birinin müvafiq rəqəmsal alətlərə çıxışları var. Beləliklə, hansısa bir problemin yaşanacağı, keyfiyyətə və intizama mənfi təsir göstərəcəyi ilə bağlı qənaətim yoxdur. Hesab edirəm ki, əslində, biz - bütünlükdə təhsil ictimaiyyəti, həm təhsil verənlər, həm də təhsil alanlar məsələyə anlayışla yanaşıb, bu prosesdə hər hansısa bir itki ilə qarşılaşmayacağıq".
Turqut Ansari
18:28 24.04.2026
Oxunuş sayı: 54
