Xəzər dənizinin səviyyəsi artır - Ekoloq perspektivləri açıqladı
Son dövrlərdə Xəzər dənizində suyun səviyyəsinin azalması diqqət çəkən məsələlərdən birinə çevrilib. Mütəxəssislər bildirirlər ki, dənizin dayazlaşması həm iqlim dəyişiklikləri, həm də antropogen amillərlə bağlıdır. Bu proses sahilyanı ərazilərdə ekoloji tarazlığa və bioloji müxtəlifliyə ciddi təsir göstərir. Problemin miqyası artdıqca onun mümkün nəticələri də daha çox narahatlıq doğurur.
Bu barədə ekoloq İlqar Xəlilov Crossmedia.az-a açıqlama verib.
O, Xəzər dənizi unikal su hövzəsi olduğunu xüsusi olaraq vurğulayıb: " Tarixi keçmişdə də Xəzər dənizində səviyyə tərəddüdü olub. Lakin müasir dövrdə, xüsusilə də XX əsrin ikinci yarısından bu günə qədər səviyyə tərəddüdünin intensivliyi yüksəlmişdir. 1996-cı ildən bu günə qədər səviyyə düşməkdədir. Hazırda səviyyə -29 m qədər aşağı düşüb. Xəzər dənizinin səviyyə tərəddüdü adətən iqlim amilləri, tektonik proseslər və insan fəaliyyəti ilə bağlıdır. Son illərdə Xəzərə gələn çay sularında azalma baş verib. Xüsusilə də ən çox su gətirən Volqa çayının üzərində tikilən su anbarlarının təsirindən, həmçinin iqlim dəyişikliyi səbəbindən düşən yağıntı və buxarlanma nisbətinin pozulmasından Xəzər dənizinin səviyyəsi ilbəil aşağı düşür. Proqnoza görə bu proses 2050-ci ilə qədər davam edəcək".
Ekoloqun sözlərinə görə, son aylarda Xəzər hövzəsinə düşən intensiv yağışlar dənizə axıb gələn suyun miqdarını artırır: "Bu, davam edərsə onda müsbət nəticə gözləmək olar. Xəzər dənizinin səviyyəsinin aşağı düşməsi ən çox dəniz daşımalarına, limanların fəaliyyətinə, sahil və su (bioresurslara) ekosisteminə, turizmin inkişafına, səhralaşmanın artmasına təsir göstərir".
Fatimə
19:43 23.04.2026
Oxunuş sayı: 55
