Regionlarda Ulu Öndər Heydər Əliyevin Anım Günü ilə bağlı silsilə tədbirlər keçirilir

12 dekabr - Ümummilli Lider Heydər Əliyevin anım günü ilə əlaqədar Dini Qurumlarla İş üzrə Dövlət Komitəsinin (DQİDK) regional bölmələri, rayon (şəhər) icra hakimiyyətləri (İH) və yerli qurumların birgə təşkilatçılığı ilə silsilə tədbirlər keçirilir.

Quba rayonunda “Ümummilli Lider Heydər Əliyev: milli-mənəvi dəyərlərimizin hamisi” mövzusunda tədbir təşkil olunub. Tədbirdə DQİDK-nın Quba-Xaçmaz regional bölməsinin müdir müavini Elnur Ağasiyev, İnsan Hüquqları üzrə Müvəkkilin (Ombudsmanın) Şimal regional mərkəzinin rəhbəri Bəhruz Əfəndiyev, İH başçısı Aparatının İctimai-siyasi və humanitar məsələlər şöbəsinin müdir müavini Anar Məmmədov, ictimaiyyət nümayəndələri, din xadimləri və dini icma sədrləri iştirak ediblər.

***

Ağsu şəhəri 4 saylı tam orta məktəbində “Ulu Öndərin ömür yolu vətənə və xalqa xidmət nümunəsidir” mövzusunda keçirilən tədbirə DQİDK-nın Dağlıq Şirvan regional bölməsinin əməkdaşı Tural Vahidov, rayon Gənclər və İdman sektorunun əməkdaşı Təhmasib Məhəmmədhüseyin, müəllimlər və şagirdlər qatılıblar.

***

Cəlilabad rayonu Heydər Əliyev Mərkəzində “Heydər Əliyev irsində milli mənəvi dəyərlər” mövzusunda keçirilən tədbir isə Dövlət Komitəsinin Masallı regional bölməsinin əməkdaşları Cavidan Rəşidov, Həsən Hümbətov, Lənkəran-Astara regional Gənclər və İdman idarəsinin nümayəndəsi Salamat Nəcəfov,  ziyalılar və gənclərin iştirakı ilə baş tutub.

***

İmişlidə “Ulu Öndər Heydər Əliyevin əsasını qoyduğu dövlət-din münasibətləri” mövzusunda tədbir keçirilib.Tədbirdə DQİDK-nın Mil-Muğan regional bölməsinin əməkdaşı Bəhrəm Abbaslı, İH başçısı Aparatının İctimai-siyasi və humanitar məsələlər şöbəsinin müdir müavini Rüfət Muradov, Mil-Muğan Regional Gənclər və İdman İdarəsinin sektor müdiri Ceyhun Əbdülov, gənclər və ictimaiyyət nümayəndələri iştirak ediblər.

***

Gəncə şəhərində "Heydər Əliyev və mənəvi dəyərlərimiz" mövzusunda keçirilən tədbirdə DQİDK-nın Gəncə-Daşkəsən regional bölməsinin müdiri vəzifəsini icra edən Həsən Məmmədov, Qafqaz Müsəlmanları İdarəsinin səlahiyyətli nümayəndəsi, Qazılar Şurasının üzvü hacı Tahir Abbasov, Gəncə şəhər Aleksandr Nevski Pravoslav kilsəsinin baş keşişi Denis Sotnikov, ziyalılar və gənclər iştirak ediblər.

***

Balakən rayonu Qaysa kənd tam orta məktəbində “Milli dövlətçiliyin möhkəmlənməsi: Azərbaycançılıq ideologiyası və mənəvi dəyərlərimiz” mövzusunda tədbir təşkil olunub. Tədbirdə DQİDK-nın Zaqatala regional bölməsinin məsləhətçisi Ruslan Əfəndiyev, İcra Hakimiyyəti başçısı Aparatının İctimai-siyasi və humanitar məsələlər şöbəsinin baş məsləhətçisi Aynur Omarova, ictimaiyyət nümayəndələri, müəllimlər və məktəblilər iştirak ediblər.

Çıxışlarda qeyd edilib ki, Ulu Öndər Heydər Əliyev siyasi fəaliyyəti boyu inkişaf edən, milli dəyərləri ilə tanınan, xarici dövlətlər arasında özünə layiqli yer tutan güclü Azərbaycan naminə böyük əzmlə çalışıb. Heydər Əliyevin dövlət-din münasibətlərinin tənzimlənməsində və bərqərar olmasında xidmətlərindən bəhs olunaraq vurğulanıb ki, çoxmillətli və çoxkonfessiyalı dövlət olan müstəqil Azərbaycan Respublikasının dirçəlişi bilavasitə Ümummilli Lider Heydər Əliyevin adı ilə bağlıdır. Diqqətə çatdırılıb ki, müasir dövrdə Azərbaycanın din siyasəti Ulu Öndərin demokratik dövlət quruculuğu kursuna əsaslanır. Respublikamızda mövcud ictimai-siyasi sabitlik, milli-mənəvi həmrəylik, etnik-dini tolerantlıq mütərəqqi tarixi ənənələrdən bəhrələnən belə uğurlu siyasətin məntiqi nəticəsidir.

Tədbirlər müzakirələrlə davam etdirilib.