Radio yayımının inkişafı üçün 15 milyon manat ayrılıb - Elmir Vəlizadə
2016-cı ildən etibarən Prezident İlham Əliyevin sərəncamlarına əsasən, mövcud radio yayım stansiyalarının maddi-texniki bazasının gücləndirilməsi, dayanıqlı fəaliyyətin təmin edilməsi və fasiləsiz enerji təchizatı üçün zəruri infrastrukturun yaradılması məqsədilə ümumilikdə 15 milyon manat məbləğində beş dəfə maliyyə yardımı ayrılıb.
Bunu Prezident Administrasiyasının sektor müdiri Elmir Vəlizadə “Azərbaycan Respublikasında radio yayımın dünəni, bu günü və sabahı” adlı tədbirdə deyib.
Onun sözlərinə görə, radio yayımının inkişafı üçün müasir texnologiyaların tətbiqi zəruridir:
“AM yayımından FM yayımına keçid və FM yayımının ölkə ərazisində genişləndirilməsi hazırda davam etdirilir. Bu işlər dövlət siyasətinə uyğun şəkildə həyata keçirilir və dövlət büdcəsindən bu məqsədlər üçün lazımi vəsaitlər ayrılır. Ölkəmizdə bu sahədə yalnız zəruri resurslarla deyil, həm də birdəfəlik maliyyə yardımları ilə dəstək göstərilməsi təcrübəsi mövcuddur".
E. Vəlizadə hesab edir ki, radio bu gün də əhalinin məlumatlandırılmasında və ictimai rəyin formalaşdırılmasında mühüm rol oynayır. (Report)
07:26 11.12.2024
Oxunuş sayı: 10217
