Hadisə

Yasamal rayonunda rəsm müsabiqəsinin mükafatlandırma mərasimi keçirilib

Yeni Azərbaycan Partiyası Yasamal rayon təşkilatının təşəbbüsü və Bakı şəhəri 53 nömrəli tam orta məktəbin təşkilatçılığı ilə böyük türk sərkərdəsi Əmir Teymurun anadan olmasının 690 illik yubileyinə həsr olunmuş rəsm müsabiqəsinin mükafatlandırma mərasimi keçirilib.

Mərasimdə Yeni Azərbaycan Partiyası Yasamal rayon təşkilatının sədri Bəxtiyar Nəbiyev, Özbəkistan Respublikasının Azərbaycan Respublikasındakı fövqəladə və səlahiyyətli səfiri Baxrom Aşrafxanov, Bakı Şəhəri üzrə Təhsil İdarəsinin sektor müdiri Günay Qurbanova, Milli Olimpiya Komitəsinin nümayəndəsi Ruslan Məmmədov, 53 nömrəli tam orta məktəbin direktoru, ərazi partiya təşkilatının sədri Tünzalə Zeynalova, səfirliyin əməkdaşları, Partiya üzvləri, məktəbin müəllim kollektivi və şagirdlər iştirak ediblər.

53 nömrəli tam orta məktəbdə keçirilən mərasimdə ilk öncə Ulu Öndər Heydər Əliyevin, Azərbaycanın ərazi bütövlüyü və suverenliyi uğrunda canlarını qurban vermiş şəhidlərin əziz xatirəsi bir dəqiqəlik sükutla yad edilib.

Crossmedia.az xəbər verir ki, Azərbaycan Respublikasının və Özbəkistan Respublikasının Dövlət Himnləri səsləndirilib.

Mərasim zamanı şagirdlər təqdim etdikləri rəsm əsərləri haqqında məlumat verib, onların yaradıcılıq yanaşmaları və tarixi mövzuya baxışları yüksək qiymətləndirilib. Müsabiqə qalibləri Özbəkistan Respublikasının Azərbaycan Respublikasındakı fövqəladə və səlahiyyətli səfiri Baxrom Aşrafxanov tərəfindən diplom və hədiyyələrlə mükafatlandırılıb. Bununla yanaşı, şagirdlər tərəfindən hazırlanmış bədii kompozisiyalar tədbir iştirakçılarına təqdim olunub və böyük maraqla qarşılanıb.

Sonda çıxış edən qonaqlar belə tədbirlərin gənc nəslin vətənpərvərlik ruhunda tərbiyəsində, tarixi şəxsiyyətlərin tanıdılmasında və yaradıcı potensialın inkişafında mühüm rol oynadığını vurğulayıblar.

Mərasim xatirə fotosunun çəkilməsi ilə yekunlaşıb.