Blogerlərin ən görünməyən problemi daxili tənhalıqdır - Psixoloq
Rəqəmsal platformaların sürətlə genişləndiyi müasir dövrdə blogerlik zahirdə ünsiyyət, populyarlıq və görünürlük simvolu kimi təqdim olunsa da, bu parlaq mənzərənin arxasında çox zaman daha dərin bir problem - tənhalıq dayanır. Minlərlə izləyici, yüzlərlə şərh və davamlı reaksiya axını insanın guya güclü sosial əlaqələr içində olduğu təəssüratı yaratsa da, bu əlaqələr hər zaman emosional yaxınlıq və anlaşılma yaratmır. Əksinə, insan daha çox göründükcə, bəzən daha az anlaşıldığını hiss edir. Məhz bu həssas məqama diqqət yönəldən Qazaxıstanlı sosial psixoloq Aiya Akilovanın mövzu ilə bağlı dəyərləndirməsi xüsusi maraq doğurur.
“Bloger daim insanların diqqət mərkəzində görünə bilər, amma bu, onun həqiqətən sosial dəstək içində olduğu anlamına gəlmir”, – deyə Aiya Akilova Crossmedia.az-a açıqlamasında bildirib.
Onun fikrincə, rəqəmsal mühit çox zaman yaxınlıq illüziyası yaradır:
“Canlı yayımlar, şərhlər, bəyənmələr və davamlı reaksiya axını insanı sanki böyük bir çevrənin içində kimi göstərir. Amma ekran bağlandıqdan sonra bu dinamikanın yerini səssizlik tutur və həmin anda emosional boşluq daha aydın hiss olunur”.
Sosial psixoloq hesab edir ki, bloqerlərin yaşadığı əsas çətinliklərdən biri də ictimai obrazla real daxili vəziyyət arasındakı məsafənin getdikcə böyüməsidir:
“İnsanlardan həmişə enerjili, pozitiv və güclü görünmək gözlənilir. Halbuki bloqer də yorula, tükənə, dəstəyə ehtiyac duya bilər. Lakin rəqəmsal mühit çox vaxt insana öz zəifliyini açıq göstərmək imkanı vermir”.
Aiya Akilovanın qənaətinə görə, bu hal xüsusilə gənc kontent istehsalçıları üçün daha həssas xarakter daşıyır. Çünki onlar çox vaxt real münasibətlə rəqəmsal münasibət arasındakı sərhədi itirirlər. Nəticədə görünürlük artır, amma həqiqi yaxınlıq azalır:
“Bu baxımdan, bloqerlərin tənhalığı şəxsi problem deyil, rəqəmsal dövrün sosial-psixoloji göstəricilərindən biridir. Bu gün insan daha çox görünür, amma hər zaman daha çox anlaşılmır”.
16:45 04.04.2026
Oxunuş sayı: 57
