Gürcüstan Aİ-nin maliyyə dəstəyindən məhrum olur
Gürcüstan 2025-ci ilin yekunlarına görə Avropa İttifaqından heç bir maliyyə yardımı almayacaq.
Crossmedia.az xəbər verir ki, bu barədə Avropa Komissiyası açıqlama verib. Bildirilib ki, Aİ-nin Gürcüstana maliyyə dəstəyinin 2026-cı ildə də bərpa olunması ehtimalı olduqca aşağıdır.
Məlumata görə, söhbət ümumilikdə 120 milyon avro məbləğində maliyyə yardımından gedir. Həmin vəsaitin ayrılması hələ 2024-cü ildə dayandırılıb. Brüsseldə hesab ediblər ki, Gürcüstan demokratiya meyarlarına cavab vermir və bu səbəbdən maliyyə dəstəyi dondurulub.
Avropa Komissiyası vurğulayıb ki, yardımın bərpası üçün Gürcüstan hakimiyyəti demokratik institutların fəaliyyəti, hüququn aliliyi və siyasi azadlıqlar sahəsində real irəliləyiş nümayiş etdirməlidir.
Qeyd edək ki, Aİ ilə Gürcüstan arasında münasibətlər son illər demokratik geriləmə ilə bağlı tənqidlər fonunda gərginləşib. Maliyyə yardımının dayandırılması da bu prosesin ən ciddi nəticələrindən biri kimi qiymətləndirilir.
Sevinc Yarməmmədova
11:40 17.12.2025
Oxunuş sayı: 1009
