Polşada hakimiyyətin iki qanadı arasında soyuq küləklər əsir
Polşanın Baş naziri Donald Tusk prezident Karol Navrotskinin artıq bir neçə həftədir onun telefon zənglərinə cavab vermədiyini açıqlayıb. Tuskun sözlərinə görə, əvvəllər hökumət və prezident administrasiyası arasında müəyyən ünsiyyət və əməkdaşlıq mövcud olub, lakin son dövrlər bu əlaqə tamamilə kəsilib.
Crossmedia.az xarici mediaya istinadən xəbər verir. Baş nazir bildirib ki, hazırkı gərginliyin əsas səbəbi prezidentin ətrafındakı çevrənin hökumətlə münasibətləri qəsdən kəskinləşdirməsidir. Onun fikrincə, bu addımlar siyasi qarşıdurmanı dərinləşdirməyə hesablanıb və konstruktiv dialoqa xidmət etmir.
“Bir neçə həftədir zəng edirəm, amma cavab yoxdur. Bu vəziyyətdə prezident sarayı ilə əlaqə saxlamaq üçün daha cəhd göstərməyin mənasız olduğunu düşündüm”, – deyə Donald Tusk vurğulayıb.
Müşahidəçilər qeyd edirlər ki, tərəflər arasında yaranan bu kommunikasiya böhranı Polşanın daxili siyasətində yeni gərginlik mərhələsinin başlanğıcı ola bilər. Analitiklər hesab edir ki, hökumət və prezident administrasiyası arasında dialoqun dayanması ölkədə siyasi qərarların qəbulunu daha da çətinləşdirə bilər.
Sevinc Yarməmmədova
10:51 17.12.2025
Oxunuş sayı: 1048
