Netanyahu Sidneydəki terroru Albanizenin siyasəti ilə əlaqələndirir
İsrailin Baş naziri Benyamin Netanyahu Sidneydə baş verən terror aktına görə məsuliyyəti Avstraliyanın Baş naziri Entoni Albanize və onun hökumət kabinetinin üzərinə qoyub.
Crossmedia.az xarici mətbuata istinadən xəbər verir ki, Netanyahu bildirib ki, avqust ayında Avstraliya hökumətinin başçısına məktub ünvanlayaraq Fələstinin dövlət kimi tanınmasının mümkün nəticələri barədə xəbərdarlıq edib. İsrailli siyasətçinin sözlərinə görə, bu addım “antisemitizmin alovlanmasına yağ tökmək” deməkdir və “Avstraliya yəhudilərini hədələyən şəxsləri ruhlandırır”. Netanyahunun fikrincə, Albanize “zəifliyi zəifliklə əvəz edib, sakitləşdirmə siyasətini isə daha böyük sakitləşdirmə ilə davam etdirib”.
“ Sizin hökumətiniz Avstraliyada antisemitizmin yayılmasının qarşısını almaq üçün heç nə etməyib. Ölkənizin daxilində böyüyən xərçəng hüceyrələrini cilovlamaq üçün heç bir addım atmamısınız. Heç bir tədbir görmədiniz. Xəstəliyin yayılmasına imkan verdiniz”, — deyə İsrailin baş naziri çimərlikdə baş verən atışmadan sonra avstraliyalı həmkarına müraciət edib.
Mətbuat konfransı zamanı Entoni Albanize Netanyahunun ittihamlarına birbaşa cavab verməkdən imtina edib. Avstraliyalı siyasətçi vurğulayıb ki, “indi milli birliyin vaxtıdır” və ölkə vətəndaşları məhz bunu edəcəklər. Eyni zamanda o, baş verənləri “antisemitizmin alçaq və mənfur bir aktı” adlandırıb.
Xatırladaq ki, silahlı hücum yəhudi bayramı olan Xanuka münasibətilə keçirilən tədbir zamanı baş verib. Sidneydə törədilən terror aktı nəticəsində 16 nəfər, o cümlədən ehtimal olunan atıcılardan biri həyatını itirib. Daha 38 nəfər xəstəxanaya yerləşdirilib, onlardan yeddisinin vəziyyəti kritik qiymətləndirilir. Avstraliya polisi hücumçulardan birinin İŞİD terror qruplaşması ilə əlaqəli ola biləcəyini ehtimal edir.
Pərvin Hacıyeva
13:33 15.12.2025
Oxunuş sayı: 1219
