Macarıstan və Polşanın XİN rəhbərləri X platformasında açıq polemikaya giriblər
Macarıstan və Polşanın xarici işlər nazirləri X sosial şəbəkəsində açıq mübahisə aparıblar.
Bu barədə Crossmedia.az xəbər verir.
Polemikaya Polşanın xarici işlər naziri Radoslav Sikorskinin, Macarıstanın baş naziri Viktor Orbanın Rusiyaya məxsus aktivlərin müsadirəsinin tənqidinə dair paylaşımına verdiyi reaksiya səbəb olub. Sikorski Orbanın mövqeyinə cavab olaraq “Viktor Lenin ordeni alıb” ifadəsini işlədib.
Buna cavab olaraq Macarıstanın Xarici İşlər naziri Peter Siyarto sərt açıqlama ilə çıxış edib. O bildirib ki, Polşa tərəfi Rusiya ilə Avropa arasında müharibə istəyi güdür və Macarıstan bu münaqişəyə cəlb olunmayacaq.
Sikorski isə cavabında qeyd edib ki, Rusiya yenidən işğala başlamadığı təqdirdə müharibə olmayacaq və əlavə edib ki, belə bir vəziyyətdə Macarıstanın Rusiyanın tərəfində yer alacağı qənaətindədir.
Qeyd edək ki, mübahisə Avropa İttifaqında Rusiyaya qarşı siyasət və Ukrayna müharibəsinə münasibət fonunda baş verib.
Türkanə Məşədiyeva
12:06 15.12.2025
Oxunuş sayı: 1078
