Ərdoğan: Cənub-Şərq və Şərqi Anadoluda demək olar hər yeri "təmizlədik"
Türkiyə Prezidenti və AKP sədri Rəcəb Tayyib Ərdoğan bildirib ki, yeni sülh prosesi çərçivəsində Cənub-Şərqi və Şərqi Anadoluda bir neçə mağara istisna olmaqla, demək olar ki, bütün ərazilər “təmizlənib” və silahlar yandırılıb.
Crossmedia.az xarici KİV-ə istinadən xəbər verir ki, Ərdoğan AKP Gənclər Toplantıları çərçivəsində universitet tələbələri ilə görüşdə hökumətin “Terrorsuz Türkiyə” adlandırdığı yeni həll prosesi barədə məlumat verib.
Prezident qeyd edib: “Hazırda həm Cənub-Şərqi, həm də Şərqi Anadolu bölgələrində bir neçə mağara qalmış ola bilər, amma bunlardan başqa hər yeri təmizlədik. Bu təmizləmə əməliyyatı davam edir”.
Prosesin komissiyası avqustun 5-də ilk iclasını keçirib və tərəflər bir-birinin ardınca hesabatlarını təqdim etməyə başlayıblar.
Noyabrın 21-də keçirilən iclasda Türkiyə Böyük Millət Məclisinin sədri Numan Kurtulmuş tərəflərdən yekun hesabatı hazırlamaq üçün təklif və fikirlərini təqdim etmələrini istəyib.
Türkan Kərimli
23:34 14.12.2025
Oxunuş sayı: 1080
