Tramp Tayland və Kambocanı yeni rüsumlarla hədələyib
ABŞ prezidenti Donald Tramp Tayland və Kamboca hərbi əməliyyatları dayandırmasa, ABŞ-nin bu ölkələrə əlavə ticarət rüsumları tətbiq edəcəyini bəyan edib.
Crossmedia.az xəbər verir ki, o, bu sözləri “The Wall Street Journal” qəzetinə verdiyi müsahibədə tərəflər arasında yaranmış hərbi gərginliyə münasibət bildirərkən söyləyib.
Tramp qeyd edib ki, Tayland və Kamboca ilə bağlı son gərginliyin azaldılması üçün tarif mexanizmindən istifadə edib. “Onlara dedim ki, əgər müharibə davam edərsə, təkcə ticarət müqaviləsini pozmayacağam, həm də ölkələrinə rüsumlar tətbiq edəcəyəm”, – deyə ABŞ prezidenti vurğulayıb. O əlavə edib ki, bu cür təzyiq vasitəsindən “ondan başqa heç kim istifadə edə bilməz”.
“The Wall Street Journal” yazır ki, müsahibə cümə günü qeydə alınıb. Tramp, ehtimal ki, həmin gün Taylandın baş naziri Anutin Çarnvirakul və Kambocanın baş naziri Hun Manetlə apardığı telefon danışıqlarına istinad edib.
ABŞ prezidenti rüsumların onun administrasiyası üçün xarici siyasətdə mühüm alət olduğunu bildirib. Tramp əlavə edib ki, ABŞ Ali Məhkəməsinin tətbiq etdiyi bəzi rüsumları qanunsuz hesab etməsi ölkə üçün “dəhşətli” nəticələrə səbəb ola bilər. Bununla belə, o, belə bir halda əlavə rüsumların tətbiqi üçün başqa hüquqi əsaslar tapılacağına əminliyini ifadə edib. Hazırda məsələ Ali Məhkəmədə baxılma mərhələsindədir.
Trampın sözlərinə görə, Tayland və Kamboca liderləri telefon danışığı zamanı 24 saat ərzində hərbi əməliyyatları dayandırmaq və sülh razılaşmalarının icrasına qayıtmaq barədə razılığa gəliblər. Lakin buna baxmayaraq, sonradan döyüşlərin davam etdiyi bildirilir.
Xatırladaq ki, oktyabr ayında Kamboca və Tayland baş nazirləri 47-ci ASEAN Zirvə Toplantısı çərçivəsində Trampın iştirakı ilə sərhəd münaqişəsinin sülh yolu ilə həllinə dair birgə bəyannamə imzalayıblar.
Dekabrın 7-də isə Kamboca–Tayland sərhədi boyunca silahlı toqquşmalar baş verib. Tayland ordusunun məlumatına görə, Kamboca qüvvələri sərhəd bölgəsində Tayland mövqelərini atəşə tutub, cavab olaraq Tayland Hərbi Hava Qüvvələri Kambocanın hərbi infrastrukturuna zərbələr endirib. Hər iki tərəfdən itkilər barədə məlumat verilib. Rusiya səfirlikləri isə turistlərə sərhəd bölgələrindən uzaq durmağı tövsiyə edib.
09:08 14.12.2025
Oxunuş sayı: 1528
