İranın dəstəklədiyi qruplar İraqda mövqelərini gücləndirir
İran tərəfindən dəstəklənən silahlı qruplar İraqda əsas rol oynamaqda davam edir və son iki ildə İsraillə münaqişə fonunda verdikləri itkilərə baxmayaraq, İranın regional təsir oxu sürətlə gücünü bərpa edir.
Crossmedia.az “The Jerusalem Post”-ə istinadən xəbər verir ki, nəşr İraq hökumətinin Hizbullah və “Ənsar Allah”ın (husilər) aktivlərinin dondurulması qərarını ləğv etməsinə diqqət çəkir və bunu İranın dəstəklədiyi qrupların Bağdaddakı təsirinin artmasının göstəricisi kimi qiymətləndirir. Qəzetin fikrincə, bu qruplar müttəfiqlərinin imkanlarını məhdudlaşdıracaq addımların qarşısını almaq gücünə malikdir.
Proses yalnız İraq daxilində baş verənlərlə məhdudlaşmır. Silahlı qruplaşmaların mövqelərinin möhkəmlənməsi fonunda İsrail-İran gərginliyi yenidən yüksələrsə, İraqın qərb səhraları raket atışları üçün potensial platformaya çevrilə bilər.
Bu vəziyyət regionda təhlükəsizlik balansına ciddi təsir göstərə və Yaxın Şərqdə gərginliyi daha da dərinləşdirə bilər.
19:27 13.12.2025
Oxunuş sayı: 1232
