Dünən gecə saatlarında Bakı şəhəri, Qaradağ rayonu, Lökbatan qəsəbəsi, "Qobu Park-1" yaşayış massivində çoxmərtəbəli binada yanğın baş verib. Hadisə nəticəsində 4 nəfər həyatını itirib, 4 nəfər isə tüstüdən zəhərlənərək xəstəxanaya yerləşdirilib. Yaralılardan 3-ü orta ağır vəziyyətdə, 1 nəfərə isə evdə ambulator tibbi yardım göstərilib.
Crossmedia.az xəbər verir ki, yanğın zamanı doqquzmərtəbəli binanın yeddinci mərtəbəsində yerləşən mənzilin mətbəx və dəhliz sahələri yanıb, digər mənzillər yanğından qorunub, bina sakinləri təxliyə olunub.
Baş Prokurorluq tərəfindən Cinayət Məcəlləsinin 124.2 və 225.3-cü maddələri ilə cinayət işi başlanıb. Hadisə yerində Fövqəladə Hallar Nazirliyinin əməkdaşları və ekspertlər tərəfindən ilkin istintaq və müayinələr aparılıb. Yanğının səbəbləri araşdırılır, iş üzrə tam, obyektiv istintaq aparılaraq qanunamüvafiq qərarın qəbul olunması təmin ediləcək.
