Rusiya Bankının keçmiş rəhbəri Sergey Dubinin vəfat edib
Rusiya Bankının sabiq sədri Sergey Dubinin dekabrın 4-də 74 yaşında dünyasını dəyişib. Mərkəzi Bank rəhbərliyi mərhumun ailəsinə və yaxınlarına başsağlığı verib.
Crossmedia.az bu barədə xarici mənbəyə istinadən xəbər verir.
Rəsmi məlumatda qeyd olunur ki, Dubinin ölkə iqtisadiyyatı üçün ən çətin dövrlərdən birində — 1995–1998-ci illərdə Rusiya Bankına rəhbərlik edib və iqtisadiyyatın sabitləşdirilməsi proqramının həyata keçirilməsində mühüm rol oynayıb. Məhz onun rəhbərliyi dövründə rublun yenidən denominasiya prosesi aparılıb.
Sergey Dubinin SSRİ prezident administrasiyasında iqtisadçı-ekspert kimi fəaliyyət göstərib, 1994-cü ildə isə Rusiyanın maliyyə naziri vəzifəsini icra edib. Daha sonra “İmperial Bank” sədrinin birinci müavini və “Qazprom”un İdarə Heyətinin üzvü olub.
1995-ci ilin noyabrında Rusiya Bankının rəhbəri təyin edilən Dubinin 1998-ci il defoltundan sonra vəzifədən azad edilib. Sonrakı illərdə o, RAO UES şirkətində maliyyə direktoru, 2023-cü ildən isə Moskva Dövlət Universitetinin İqtisadiyyat fakültəsində Maliyyə və kredit departamentinin akademik direktoru kimi çalışıb.
Bundan əvvəl Rusiya Mərkəzi Bankı pul siyasətinin yumşaldılması ilə bağlı planlarını açıqlamışdı.
23:33 04.12.2025
Oxunuş sayı: 886
