Varşavada azərbaycanlı gənc tədqiqatçının uğur hekayəsi
Polşanın paytaxtı Varşavada yaşayan azərbaycanlı gənc tədqiqatçı Ülkər Cabbarlı elmin müxtəlif sahələrində qazandığı yüksək nailiyyətlərlə diqqət çəkir.
Crossmedia.az xəbər verir ki, Bakı Mühəndislik Universitetinin məzunu, Varşava Universitetinin doktorantı Ülkər Cabbarlı Polşanın Milli Elmi Mərkəzinin maliyyələşdirdiyi nüfuzlu “OPUS 27” layihəsində tədqiqatçı kimi çalışır. O, ikiölçülü materialların elektron xüsusiyyətlərini süni intellekt və sıxlıq funksional nəzəriyyəsini araşdırır.
O, Polşa Azərbaycanlıları Şurasının İdarə Heyətinin üzvüdür və təşkilatın Avropada Azərbaycan həqiqətlərinin müdafiəsində rolunu gücləndirən tədbirlərdə fəal iştirak edir.
ATƏT-in 2025-ci il Varşava İnsan Ölçüsü Konfransında Azərbaycanı təmsil edib. Erməni QHT-lərin təxribatçı iddialarına faktlarla cavab verib və Azərbaycanın humanitar mövqeyini beynəlxalq auditoriyaya təqdim edib.
Ülkər Cabbarlı magistratura təhsilini Varşava Universitetində yüksək nəticə ilə başa vurub və doktoranturaya qəbul zamanı ilk beşliyə düşüb. Fizika sahəsi üzrə bu nailiyyəti göstərən ilk qadın və ilk beynəlxalq tələbədir.
Polşanın NOMATEN İnstitutunda təcrübə keçən ilk azərbaycanlı tələbə kimi burada hidrogen enerjisinə dair iki elmi işini formalaşdırıb və beynəlxalq impaktfaktorlu jurnallarda məqalələrlə çıxış edib. O, həmçinin Delft Texnologiya Universiteti və London Universitet Kolleci ilə birgə tədqiqatlar aparır, 2D ərintilərin elektron davranışını maşın öyrənməsi modelləri vasitəsilə araşdırır.
Ülkər Cabbarlı elmi fəaliyyətlə yanaşı, qadınların STEM sahəsində dəstəklənməsi işində də iştirak edir. “Women in STEM” qrantı, eləcə də Hökumə Əliyeva adına təqaüdün qalibidir.
Varşava Azərbaycan Evində keçirilən “Qərbi Azərbaycan həqiqətlərinə gənclərin baxışı” seminarında da gənclərin maarifləndirməsi, tarixi yaddaşın qorunması və milli kimlik məsələlərinin Avropada yaşayan azərbaycanlılar arasında təbliğində böyük fəallıq göstərir.
16:37 04.12.2025
Oxunuş sayı: 1047
