Rustavi Təhsil və Mədəniyyət Mərkəzində ədəbiyyat gecəsi keçirilib
Gürcüstanda fəaliyyət göstərən Rustavi Təhsil və Mədəniyyət Mərkəzində tanınmış gürcü şair və yazıçıların yaradıcılıqlarına həsr olunan ədəbiyyat gecəsi keçirilib.
Crossmedia.az xəbər verir ki, tədbirdə mərkəzin gürcü dili və ədəbiyyat kursunun şagirdləri Şota Rustavelinin aforizmlərini, Akaki Tseretelinin “Suliko”, Vaja-Pşavelanın “İya”(Bənövşə), Aleksandre Çavçavadzenin “Vah! Droni, droni”, Leo Kiatşelin “Mitsaa”, Ana Kalandadzenin “Tuta” əsərlərindən parçalar səsləndiriblər, həmçinin Nodar Dumbadzenin “Me, bebia, İliko da İlarioni” (Mən, nənə, İliko və İlarioni) romanından və İlya Çavçavadzenin “Katsia adamiani?!” (“Bu da insandırmı?) povestindən səhnəciklər nümayiş etdiriblər.
Mərkəzin rəhbəri Raida Dərziyeva gürcü yazıçı və şairlərinin əsərlərinin tədrisi xalqlar arasında ədəbi dostluğun möhkəmlənməsinə töhfə verdiyini və bədii ədəbiyyatın uşaqların şəxsiyyət kimi formalaşmasında mühüm rol oynadığını bildirib. Ədəbiyyatla erkən tanışlığın onların dünyagörüşünü genişləndirdiyini və təbiətə, insanlara marağını artırdığını qeyd edib. Həm Azərbaycan, həm də gürcü yazıçılarının əsərlərinin mərkəzin tədris proqramına daxil edilərək şagirdlərə müntəzəm şəkildə öyrədildiyini diqqətə çatdırıb.
Tədbir çərçivəsində şagirdlər arasında bilik yarışması keçirilib. Onlar indiyədək öyrəndikləri mövzular üzrə sualları cavablandıraraq bacarıqlarını nümayiş etdiriblər.
Sonda müəllimlər və valideynlər şagirdlərin nailiyyətlərindən məmnun qaldıqlarını dilə gətirərək gürcü dili müəllimi Tsira Londaridzeyə və mərkəzə təşəkkürlərini bildiriblər.
14:58 04.12.2025
Oxunuş sayı: 5020
