Afrikada Azərbaycan şirkətlərinin iştirakı ilə ilk biznes-forum keçirilib
Efiopiyanın paytaxtı Əddis-Əbəbədə Afrika qitəsində ilk dəfə olaraq Azərbaycan iş adamlarının iştirakı ilə birinci Efiopiya-Azərbaycan biznes-forumu keçirilib.
Crossmedia.az xəbər verir ki, 100-dən çox iştirakçının qatıldığı forum AFAZ-ın (Africa-Azerbaijan Cooperation) təşkilatçılığı və Azərbaycan Respublikasının Efiopiyadakı səfirliyinin dəstəyi ilə reallaşıb.
Forumun açılış mərasimində Azərbaycan Respublikasının Efiopiyadakı səfiri Ruslan Nəsibov, Efiopiya Xarici İşlər Nazirliyi — Biznes Diplomatiyası üzrə baş direktor səfir Yohannes Fanta, Efiopiya Ticarət və Sahəvi Assosiasiyalar Palatasının vitse-prezidenti Sebsib Abafira Abajobir, Əddis-Əbəbə Ticarət və Sahəvi Assosiasiyalar Palatasının Baş katibi Meseret Molla Kassahun çıxış edib.
Azərbaycan biznesinin Afrika bazarına inteqrasiyası üçün real imkanlar yaradacaq forum, həmçinin iki ölkənin sahibkarları arasında birbaşa dialoqa start verib. Şirkətlər qida və kənd təsərrüfatı, tikinti, logistika, ticarət, ixrac-idxal, sənaye materialları və digər sahələr üzrə təmsil olunub.
Africa-Azerbaijan Cooperation (AFAZ) təşkilatının təsisçisi Dr.Rəna Qəfərova forumun məqsədləri, Afrika-Azərbaycan əməkdaşlığının perspektivləri və konkret investisiya — ticarət imkanları barədə geniş təqdimatla çıxış edib.
Forum çərçivəsində Azərbaycan və Efiopiya tərəfləri arasında özəl sektora aid 3 anlaşma memorandumu imzalanıb, həm B2G (Business-to-Government), həm B2B (Business-to-Business) danışıqlar aparılıb.
20:19 28.11.2025
Oxunuş sayı: 1058
