Diaspor

Londondakı “Acapella Academy” incəsənət mərkəzinin fəaliyyəti ilə tanışlıq olub

Böyük Britaniyanın paytaxtı Londonda Azərbaycan qədim və zəngin musiqi mədəniyyətini təbliğ edən, onun incəliklərini həm yerli əhaliyə, həm də soydaşlarımıza öyrədən “Acapella Academy” adlı incəsənət mərkəzi fəaliyyət göstərir. Mərkəzin təsisçiləri azərbaycanlı musiqiçilər Səadət və Rasim Fərziyevlərdir.

Crossmedia.az xəbər verir ki, mərkəzin fəaliyyəti ilə yaxından tanışlıq və gələcək əməkdaşlıq planlarının müzakirəsi üçün Azərbaycan Respublikasının Diasporla İş üzrə Dövlət Komitəsinin şöbə müdiri Səlhət Abbasova “Acapella Academy”-də olub.

Görüşdə mərkəzdə musiqi nəzəriyyəsi, müxtəlif alətlərdə ifa, vokal, balet, müasir rəqs, rəsm və şahmat dərslərinin keçirildiyi qeyd olunub. Həmçinin gələcəkdə kamança dərslərinin və Azərbaycan rəqslərinin tədrisinin təşkilinin də planlaşdırıldığı barədə məlumat verilib. Mərkəzin hər yaşdan insanlara inkluziv mühitdə özünüinkişaf və yaradıcılıq imkanı yaratdığı diqqətə çatdırılıb. Mərkəzin idarəçiliyinin və fəaliyyət prinsiplərinin gələcək nəsillərə düzgün şəkildə ötürülərək qorunacağı bildirilib.

Şöbə müdiri xaricdə yaşayan soydaşlarımızın mədəniyyət və incəsənət sahəsindəki fəaliyyətinin təqdir edildiyini söyləyib, komitənin diaspor nümayəndələri ilə əlaqələrin möhkəmləndirilməsinə və peşəkar şəbəkələşmənin genişləndirilməsinə daim dəstək göstərdiyini vurğulayıb.

“Acapella Academy” ilə birgə layihələr üzrə əməkdaşlıq imkanları barədə fikir mübadiləsi aparılıb və mərkəzə komitə adından milli suvenirlər hədiyyə edilib.

Qeyd edək ki, kamança, skripka ifaçısı Rasim Fərziyev və sənətşünaslıq üzrə fəlsəfə doktoru, “Doğma elin halayları” kitabının müəllifi, bəstəkar Səadət Fərziyeva eyni zamanda Birləşmiş Krallıqdakı “Qarabağ” məktəbinin musiqi müəllimidirlər. Onların rəhbərliyi ilə məktəbin şagirdlərindən ibarət xor kollektivi müxtəlif tədbirlərə qatılaraq Azərbaycan dilində mahnılar səsləndirir.