Bolnisidə AMEA-nın 80 illik yubileyinə həsr olunan tədbir keçirilib
Gürcüstanın Bolnisi rayonunda fəaliyyət göstərən “Qafqaz Hüquq və İnteqrasiya Mərkəzi”ndə Azərbaycan Milli Elmlər Akademiyasının (AMEA) 80 illik yubileyinə həsr olunan tədbir keçirilib.
Crossmedia.az xəbər verir ki, tədbirdə Azərbaycan elminin inkişafı, AMEA-nın ölkənin elm mühitində oynadığı rol və Prezident İlham Əliyevin Azərbaycan dilinin qorunması və inkişafı ilə bağlı fikirləri xüsusi vurğulanıb.
Bildirilib ki, dövlət başçısının Azərbaycan dilinin zənginliyi və qorunması barədə səsləndirdiyi fikirlər təkcə ölkəmizdə deyil, onun hüdudlarından kənarda, o cümlədən Gürcüstanda yaşayan soydaşlarımız arasında da böyük rəğbətlə qarşılanır. Azərbaycan dili dərslərində Prezident İlham Əliyevin çıxışından fraqmentlər nümayiş etdirilib, nitqində yer alan əsas məqamlar müəllim və şagirdlərə izah olunub.
Mərkəzin rəhbəri Rezo Həsənov Gürcüstanda Azərbaycan dilinin tədrisinin daha da təkmilləşdirilməsinin əsas hədəflərdən olduğunu bildirib: “Şagirdlərimizə ana dilimizi daha yaxşı və mükəmməl öyrətmək üçün müxtəlif kurslar təşkil olunur, kitabxanalar yaradılır, dərsliklər əldə edilir. Məktəblərə hər il Azərbaycanın Elm və Təhsil Nazirliyi tərəfindən Azərbaycan dili və ədəbiyyatı dərslikləri göndərilir. Prezident İlham Əliyevin AMEA-nın 80 illik yubileyində söylədiyi fikirlər bizim üçün həm çağırış, həm də ilham mənbəyidir.”
Faxralı kənd tam orta məktəbinin Azərbaycan dili və ədəbiyyatı müəllimi Fatma Əliyeva da çıxışında Prezident İlham Əliyevin fikirlərinə xüsusi diqqət çəkib:
“Prezident İlham Əliyevin AMEA-da səsləndirdiyi fikirlər bir soydaş olaraq məni qürurlandırdı. Bu, həm xaricdə yaşayan azərbaycanlılara diqqət və qayğıdır, həm də dilimizin təmizliyinə dair mesajdır. Mən də bir müəllim kimi şagirdlərimə bu dili sevdirməyə çalışıram.”
Mərkəzdə ikinci təhsil alan gənc iştirakçı Sona Tağıyeva isə Azərbaycan dilini daha dərindən öyrənmək imkanından məmnunluğunu ifadə edib.
Tədbir AMEA-nın 80 illik yubileyinin soydaşlarımız arasında geniş şəkildə qeyd edilməsinin, həmçinin Azərbaycan dilinə olan marağın və sevginin artmasının bariz nümunəsi kimi qiymətləndirilib.
16:10 26.11.2025
Oxunuş sayı: 515
